Ha ryngkat ka Bom ka Bhuri, ka shad ka kmen ki khun jong ka Seiñ Raij Jowai mynta ka sngi (Mulong) kaba dei ka sngi ba-ar jong ka Shad Behdieñkhlam ka dei ka bynta jong ki khun jong ka Kmai Raij ban wan rah ia ki Diengkhlam jong ki na ki khlaw kumjuh ia Khnong Blai ban pynpoi ia ki ha Iawmusiang.
Mynta ka sngi naduh dang step ha ka por 5 baje kala don shwa ka jingpyndep ia ka jingkñia Aitnar, ha shwa ba ki khun ka Kmai Raij kin leit ban rah ia ki Diengkhlam jong ki.
Hadien kane kala don ka jingiakynduh jong ki khun ka Kmai Raij ha Mynkoi pyrdi (Iaw Iongpiah), khnang ba kin ioh ban ia mih la ka jong ka jong ban leit rah ia ki Diengkhlam.
Ha ka por janmient la lah ban pynpoi lut ia ki Diengkhlam ryngkat ka Khnong Blai ia kaba la buh ha Loom Sooiung.
