Ka Civil Hospital, Khliehriat, ka jaka sumar paidbah ba radbah jong ka East Jaiñtia Hills District, ka la kylla long ka tyllong jong ka jingma ïa ka koit ka khiah jong ki paidbah na ka bynta ka imlang sahlang. Ki nala um kiba la shah pynjulor jur bad ki tanky painkhana kiba tuid um na katei ka hospital ki la pynmih ia ki jingsma jakhlia kiba sniew shapoh ka shnong Khliehriat West, kaba pynlong ia ka jingim ba man ka sngi kaba ym lah ban shah shuh ia ki nongshong shnong kiba sah hajan katei ka jaka sumar. Ki longïing kim lah ban ïasam jingbam, ki khynnah kim lah ban ïalehkai shabar bad ka jingsma kaba neh ka buh jingma kaba khraw na ka jingpang ba ïoh na ka um bad na ka lyer.
Kaba pynlong ia kane ka jingeh kaba kham pynkhuslai shuh shuh ia ki nongshong shnong ka long ba kam dei kaba shuh kaba dang thymmai, hynrei ki nongshong shnong ka Khliehriat West kiba sah marjan, ki la ujor la bunsien ha ki por ba la dep sha u Medical Superintendent u Dr. A. Lakiang jong ka Civil Hospital, Khliehriat, hynrei sngewsih la shuh sngap jar jar bad ka jingbym leh ei ei. Ym shym la hukum ban jurip, ym shym la maramot bad ym shym la ai jingkynthoh. Ka jingtuid um ki la nang jur, bad ka jingjynjar jong ki paidbah ka la bteng khlem da lah ban tehlakam.
Ha ka 25 tarik, ka JNC Khliehriat Circle ka la aiti ïa ka jingujor kaba pura sha u Ophisar jong ka District Medical and Health Officer (DMHO), u Dr. D. Shylla.
U Dr. Shylla mynta ka sngi ka 26 tarik u February 2026, u la pynlong ia ka jingjurip lang, ba la ialam da u bah Symboh Baiar Sumer, General Secretary ka JNC Khliehriat Circle, ha ki nongïalam jong ka “Dong Khlieh Wahshasem”, u bah Teibor Swer (Waheh Dong) bad u Mebanteilang Sukhlain (Secretary Dong) jong ka shnong Khliehriat West. Ha ka jingleit jurip la lap ia ki jingshisha baroh.
Ha kane ka jingleit jurip u Dr. D. Shylla u la pynthikna ïa ka seng bad ki nongïalam shnong ba un sa bthah ïa u Medical Superintendent bad In-Charge jong ka Civil Hospital, Khliehriat, ban shimkhia ïa kane khlem da pynslem shuh.
Na ka liang ka seng ka pynpaw ka jingsngewnguh ia u Dr. Shylla uba la iatreilang na ka bynta ka jingbha jingmiat jong ki paidbah nongshong shnong.
Lada iakane ka kam ym lah ban pyndep hapoh ka por kaba biang, ka Jaiñtia National Council bad ki nongïalam shnong jong ka Shnong Khliehriat West ki long kiba la pynkhreh pura ban leh da kaba tyngeh kynthup ïa ki dorkhas ba pura sha ka tnad ka Koit ka Khiah jong ka Sorkar Jylla bad ban ujor sha ka Meghalaya Human Rights Commission namar ba kane ka kam ka long kaba la slem palat.
Ka JNC ka khot ia ki bor pyniaid ka Koit ka Khiah ban buh hakhmat tam iaka koit ka khiah jong ki paidbah. Ki paidbah ka shnong Khliehriat West ki dei hok ban ioh ia ka mariang kaba khuid kaba suba, kaba koit ba khiah bad ki dei hok ban ioh mynta hi. Pynkut ka kyrwoh na u Symboh Baiar Sumer General Secretary JNC Khliehriat Circle.
