Ka Jaintia National Council (JNC) ha ka kyrwoh ba la phah kala ong ba lyngba ka jingsaphriang stet jong ka video ha kaba la iohi shai ba ki BSF ki la rung sha kawei ka longïing ha Kuliang EJHD bad ki la leh baheh ryngkat ka tim sih tim sang bad ki tiar pynmynsaw ha ka kti jong ki. Kane ka jingleh ki BSF kala pynkyndit bad pynher syrngiew ia ki nongshong shnong haduh katta katta namar ka jingjia ruh ka jia ha ka por miet por synnia bad ym lah ruh ban tip kaei ka jingmut jong ki sha lyndet.
Kat kum ka video bala paw sha ki social media “Ngi iohi ba katno tam ka jingleh donbor bad ka jingleh khlemakor ki BSF ryngkat ka tim sih, kata ruh ia ki ba pli ki longkmie bad kane ka jingleh jong ki BSF ka pyni shai ba kim burom shuh ia ki nongshong shnong bad ia ki Waheh Shnong. Ka seng ka sngewphylla ba lada don kaei re kaei ka kam dei ban pyntip shwa sha ki Waheh Shnong shwa ban rung shapoh ka shnong hynrei kim shym la leh satia kumta, sa kawei ruh ki rung ha ka por jong ka jingthiah jingdem ki briew bad ia kane hi ngin nym lah da lei lei ruh ban pdiang” ong shuh shuh ka JNC.
Ka seng ka buh ruh ka jingkylli ba balei kim shym ialam iaki pulit namar katkum ka aiñ ki BSF da lei lei ruh kim lah ban trei shabar jong u pud, bad ia kane hi ki dei ban pan iarap na ki pulit kiba hapoh kato ka area ban iohleh iakaba donkam, hynrei ia kane ruh kim shym la leh, bad kane ka pyni ba ki BSF kim burom shuh wat iaki pulit ka jylla. Bad lada ka iai long kumne imat ka sorkar ruh kam don burom shuh ha khmat kine ki BSF.
Ka seng ha kine ki bnai ba lah dep kalah iakynduh ruh markhmat bad u symbud myntri rangbah ka jylla u Prestone Tynsong ryngkat bad ka jingthoh badei ban weng noh mardor ia ki ktem jong ki BSF kiba shong hapoh khap shnong khap thaw namar kine ki jaka kim dei satia ki jaka shong jong ki BSF.
Halor kato ka video ba la saphriang naka liang ka seng ka dawa jur na ki bor jong ka sorkar badei ban kem mardor ia kito ki BSF kiba donkti ban huri hura bad tim sih ia kato ka longing. Ka aiñ ka dei ban long salonsar khlem da niew shiliang, watla u dei u BSF ruh. Bad lada ka sorkar kam lah ban kem iaki katkum ka aiñ, kane kan long shai ba ka sorkar ka pyndem tdong hakhmat ki BSF.
Kyntang iawai ka seng ka phah ka kyrwoh kaba shai sha ka sorkar ba ka dei ban leh ia kaba donkam tam ym ban shu peitkai ia ka eh ka shon jong u paidbah bad lada ka sorkar kam shym lah leh bad ka shu sngapjar, na ka liang jong ka seng kan sa phai da kiwei pat ki sienjam bad yn iakhun ruh tyngeh ban pynioh iaka jingbishar kaba hok bad iaka bha ka miat hi ka imlang ka sahlang