Ka Federation of Khasi Jaintia & Garo People (FKJGP) Sengkmie ka dap da ka jingsngewkhia bad ka pynrem jur halor ka jingshah kem u President ka NEHUSU u Samla Sandy Sohtun.
Ka Seng ka la ïohi ia ka kynrum kynram kaba mih ha katei ka Skulbah ha kaba ki samla pule hapoh ka jingialam jong u Samla Sandy Sohtun President jong ka North Eastern Hills University Students Union (NEHUSU) ki la sei madan ia ki kam bamsap bad ka jingbym iaid ryntih jong katei ka Skulbah haduh ba kan da poi u pud ban shah thngan ki samla pule katei ka Skulbah bad ban dawa weng kam ia u VC.
Ka Seng ka pynrem jur halor ka jingshah pharep u President ka NEHUSU u Samla Sandy Sohtun ha u Nonghikai jong katei ka Skulbah bad ka lah ban don kaei kaei sha lyndet bad ka Seng kan ym shong kli kti bad kan wad bniah haba ïadei bad ka jinglong jingman ha katei ka Skulbah.
ka Seng kaba la ioh jingujor halor ka jingshah niewbeiñ ka jingshah leh shiliang khmat ym tang ia ki Samla Pule hynrei wat ia ki nongtrei jong katei ka Skulbah. Na ka liang ka Seng ka maham jur ia ki bor nabar ba kim dei ban pyrshang ban ialam bakla ne ban pyrshang tap eitmiaw ia ki kam ba u Vice Chancellor u la pynjah burom ia ka NEHU ha kaba wat ki samla pule ki nongtrei kim don mon shuh ia u VC ba un pyniaid ia katei ka skul bah NEHU.
Ka FKJGP kan ym ailad ba ki samla trai ri kin shu long ki langkñia tang na ka bynta ka jingmyntoi jong ki briew kiba nabar kiba don bynta ha ka saiñ pyrthei jong ka Ri India kaba ïar.
Kane ka long ka kyrwoh na u Vice President jong ka FKJGP Sengkmie u Kitboklang Nongphlang.