Ka KSU Wapung Unit lyngba kane ka kyrwoh ka pynrem jur ia ka jingshah dkhat jubor ia ka jingim jong kawei ka longkmie na ka Shnong Wapung Shnong ka ba la jah la kumba shitaiew. Katkum ka jingtip kyllum la ong ba kane ka longkmie ka leit shim dawai na Shnong ka Mookhep myn ha ka sngi 25.12.23 bad ka khlem wan phai shuh sha la ïing naduh katei ka sngi bad tad haduh ba na ka liang ka shnong ki la pynbna paidbah bad la leit wad bad la lap ia ka met iap jong ka ha shnong Mookhep.
Kane ka jingjia kala pynsgewsih bad kaba kthah mationg shi katei eh ia ka imlang sahlang jong ngi namar ba ia kane ka longkmie la shim jubor ia ka jingim jong ka da ki riew thrang snam ki bym don shuh ia ka mynsiem para briew.
Ka seng ka daw jur ba ki bor jong ka ain ki dei ban shimkhia ban thwet ia kum kine ki riew thrang snam bad ban pynshitom ia ki da kaba tyngeh.
Ka seng ka khmih ba ka jingtohkit na ka liang ka tnat ba dei peit kan long kaba seisoh bad ka ban wanrah ia ka hok jong kane ka longkmie bad kiba ha iing ha sem jong ka.
Ka KSU Wapung Unit ka iai ban bad ka pynrem jur ia kum kine ki jingjia bad kam lah ruh ban pdiang ia kum kine ki jingjia haka imlang sahlang, pynkut ka kyrwoh.
Lyngba kane ka kyrwoh khubor ka Seng ka phah ka jingsngewlem sha kiba ha iing ha sem kane ka longkmie.
Uba pyntip sha phi
Samla Hamewanpynhun Ryngkhlem
General Secretary
KSU Wapung Unit