Ka Sein kur Dorbar pyllun jong ka kur Biam kaba dei shikur bad ka Buam ka la
pynpaw ka jingsngewsih bad pynrem jur ia jingleh tohmet jong ki shipai Border
Security Force (BSF) ia u Dr. Seiboklang Buam, u Officer incharge jong ka tnat
Veterinary Dispensary ha Muktapur, da kaba thmu ban pynlaw lyngkhuid ia u baroh
shi rynieng, kumjuh halor ka jingthmu ban siat iap ia u, katba u dang leit
khwai dohkha ha wah Lakroh ha ka por 12:30 shiteng sngi hynnin ka sngi Sunday.
Ka Kur Biam ka dawa na ki bor jong ka aiñ ba dei ban kem shi syndon ia kine
BSF ba donkti ba kynthup ia u Rajendar Kumar bad ia u paralok jong u kiba dei
ki shipai BSF jong ka Muktapur, West Jaiñtia. Ka Kur kala kynthoh jur ba kane
ka jingleh don bor jong ki BSF ban shim ia ka aiñ ha kti la jong dei la ban kem
ia ki bad pynshitom kat kum kyndon jong ka aiñ namar ka aiñ kam shah ban shim
ia ka aiñ ha kti la jong ia u no u no u briew wat ia kine BSF ruh.
Katkum ka jingiathuh jong u Dr. Buam la ong ba katba u dang iaid lynti ki
BSF ki la pyrshang ban tohkit ia u kumba u dei u khar Bangladesh, ha kata ka
por u la kylli ia ki shipai BSF balei kim kem ia ki khar Bangla kiba juh wan
man ka por sha India bad ia ki masi kiba don ha khappud.
Ha kane ka por, u la sei ia ka mobile ban ring dur ia ki masi hadien ba ki
sihpai kila iohi ia kane ki la knieh jubor ia ka mobile bad ki la ong ban tan
jubor ia u sha Zero Point ban siat iap ia u hangta, ha kane ka por u la pyrta
briew ban ioh jingiarap bad kumta la wan poi ar ngut ki kynthei ba khwai marjan
ban iarap ia u.
La iathuh ha kane ka por ki BSF ki la pyrshang ban pynlaw lyngkhuid ia u, ki
la dawa ruh ba u dei u ban pynmap na ki haduh sla kjat bad lada um leh kumta kin
shoh ia u.
Na ka liang jong u ma Marshall Biam u wei na ki dkhot rangbah jong ka Kur Biam u pynpaw ka jingkhublei kyrpang ia kito ki longkmie ki ba ai jingiarap ia u kur jong ki bad da ka jingshlur jong ki u la lait iap na kti ki nongshun pynkut ka kyrwoh khubor ba la phah da u ma Marshall S.B. Biam.
We use cookies to ensure that we give you the best experience on our website. If you continue to use this site we will assume that you are happy with it.Ok
