Ka Meghalaya Tourism Development Forum (MTDF ) hynne ka sngi ka 30 tarik ka pynrem jur halor ka jingthoh jong kawei na ki kot khubor ba la tip kum ka Times of india halor ka jingkynnoh ba ka Meghalaya ka dei ka jaka kaba jur bha ki kam sniew.
Haba kren sha ki lad pathai khubor u Chairman ka MTDF u Larsing Ming Sawian u la ong ki National News ki pyrshang ban pynphriang khubor bakla ia ka jylla.
U pynpaw ba ki nongshong shnong ka jylla ki pdiang sngewbha ia ki nongwan jngohkai pyrthei sha kane ka jylla bad kam don kano ka kam sniew.
U la ong ka jingpynmih khubor ka Times of India ka long ka bym shym la poi pyrkhat bad kumta ka MTDF ka dawa na ka Times of India ba ka dei ban pynshai halor kane ka jingkynnoh bad ka long ka jingkynnoh ka bym don nongrim bad ka buh ia ka jylla ha ka jingeh haba iadei bad ka roi ka par jong ka jylla khamtam ha ka kam jngohkai namar ka Jylla Meghalaya ka dei ka jaka kaba khring bha ia ki nongwan jngohkai pyrthei na kylleng ka pyrthei.