Ka Synjuk Waheh Shnong East Jaintia Hills District, mynta ka sngi da ka jingsngewkhia kaba jur, ha ka jingialang jong ka Executive Committee jong ka, da kawei ka sur, ka la rai ban pynrem jur halor ka jingnud jong u Waheh Shnong, ka Thangskai, East Jaintia Hills, ban ai sertiphiket nongshongshong bapura ia u wei u barjylla (Tkhar) u bym dei satia u trai ri trai muluk na ka shnong Thangskai, kat haduh ba katei ka sertiphikat ka la ktah mynta wat ia ka bhah pule doctor jong ki khun ka Bri U Hynñiewtrep. “Ka jingleh jong utei u Waheh Shnon, ka shnong Thangskai, nalor ba ka la tuh ia ka bhah pule doctor jong ki khun ka Bri U Hynñiewtrep, kane kan sa ktah ruh ia ka jaitbynriew trai ri trai muluk ba rit paid jong ngi hadien habud.
Kumta, ka SWS-East Jaintia Hills District, ka pynrem jur ia kane ka jingleh jong utei u Waheh Shnong,” ong u Hambertus Nongtdu, President jong ka SWS-EJHD. U President ka synjuk, u la ong shuh shuh ba, ym tang kitei ki jingktah ia ka jaitbynriew jong ngi, kat kum ba la kdew haneng, hynrei kane ka jingleh jong utei u Waheh Shnong, ka la wanrah ruh ia ka jingjahburom bad ruh ka jingduh jingshaniah ia kiwei pat ki Waheh Shnong jong ka East Jaintia Hills District. Kumta, ha ka jingiadei bad kane, lyngba une u kyrwoh, ka synjuk, ka la dawa jur ruh na ka Dorbar Shnong, Thangskai, bad ruh na ki bor sorkar kynthup na ka JHADC, ban pynduh pyndam noh shisyndon ki ia katei ka sertiphiket jong u tei u barjylla.
U kyrwoh na ka synjuk, u la ong shuh shuh ba, halor ka jingmih jong katei ka kam bym lah ban pdiang na ka Shnong Thangskai, kaba buh pynban ia ka Jaitbynriew ha ka jingeh bad ka jingma, ka SWS-EJHD, mynta hi ka sngi lyngba une hi u kyrwoh, ka la rai ban kyntu lane pynkynmaw ia baroh ki dorbar Shnong lane ki waheh Shnong ha East Jaintia Hills District, ba ki dei ban long kiba husiar bha ha kaba ai ia ki jait sertiphiket bapher bapher, khnang ba kane kan ym buh ia ka ri bad ka jaitbynriew rit paid jong ngi ha ka jingeh hadien habud.
Ka SWS-EJHD, lyngba une u kyrwoh, ka la kyntu ruh ia ki bor sorkar bad ruh ia kiwei kiwei pat ki bor ba ki dei ban da da bishar bniah bha ia baroh ki sertiphiket na ki shnong ba la submit sha ki, bad ruh ban pyntip wut wut sha ki Dorbar Shnong lada don kino kino ki jait sertiphiket kiba ki i shankhmat. “Ha kajuh ka por, ka synjuk, mynta hi ka sngi, na ka bynta ka iap ka im jong ka ri bad ka jaibynriew ka la rai ba, lada long kaba lah, nangne shakhmat yn shna noh tang kawei ka dur ka dar (format) na ka bynta ki sertphiket bapher bapher ia kiba yn sa pyndonkam beit bad ryntih ha baroh ki shnong ha East Jaintia Hills District, bad ba, kat kum ba long mynta, kane ka kam ka dang don hapoh ka jingbishar bniah jong ka SWS-East Jaintia Hills District”, la pynkut u kyrwoh ba la pyllait na u President ka SWS-East Jaintia Hills District ma Hambertus Nongtdu.
