Ka Voice of the People Party ka pynrem jur ia ka jingleh jubor jong ka Sorkar MDA ia ki nongialam bad ki dkhot jong ka Meghalaya Commercial Truck Owners’ and Drivers’ Association.
Ka jingbom ka jingtied bad ka jingkem ka long ka kam lehjubor kaba dei ban pynrem da baroh. Ka jingleh donbor bad jingleh riewkhlaw ka Sorkar ka la wanrah ia ka jingtieng bad rit mynsiem ia ki nongshong shnong jong ka shnong Mawryngkneng khamtam ki longkmie bad ki khynnah.
Ka Sorkar MDA ka dei ban kynmaw ba ka dei ka sorkar kaba la jied da u paidbah na ka bynta u paidbah ym da u paidbah na ka bynta ki heh saipan jong ki kharkhana shna dewbilat. Kaba lynngoh ka long ba ka sorkar ka hap ban ai jingiada la kum ki VIP ia ki kali Kompeni.
Kane ka rukom leh ka Sorkar kam dei kaba thymmai. Kumban shu pynkynmaw ka sorkar MDA mynshwa ka la tied la bom jem ia ki paidbah ha ka por ban pynlong ia ka jingpynsngew paidbah ban pynheh ia ka kharkhana shna dewbilat ha Thangskai, East Jaintia Hills District. Kumjuh ruh ka la ther bom pynsatkhmat ia ki nonghikai bad ki nongdie dukan ha ki por ba mynshwa.
Ka Party ka ai khublei ia ki paidbah nongshong shnong ka Mawryngkneng ki ba ieng ban ialeh pyrshah ia ka jingleh donbor ka Sorkar. Kane ka pyni ka nuksa ia ki wei ruh ba kam dei ban don ka synshar donbor ha ka ri synshar paidbah.
“Shuh shuh ngi kwah ban ban jur ba ka jingiakhih ba jaijai ka dei ka hok long briew man briew jong ki nongshong shnong bad sorkar kam dei ban iuhroit ia kata khamtam ha ba ka jingdawa ka long ka ba shongnia kumba long ka jingdawa jong kane ka Kynhun. Kumjuh ruh ngi dawa ba ia ki nongialam ba la shah kem dei ban pyllait mardor bad pyllait lut ia ki na ki jingmudui pyrshah ia ki”, pynkut ka khubor ba la pyllait da u Batskhem Myrboh
Nongaiktien ka Party.
