Ka KSU West Jaintia Hills District Unit lyngba kane ka kyrwoh ka pynpaw ia ka jingbym lah pdiang halor ka jingkam trai khlem nongrim jong u myntri rangbah ka jylla Assam, u Himanta Biswa Sarma ia ka Mukroh.
Katkum ka khubor na ki lad pathai khubor bapher bapher, u Dr. Himanta u la kam ba ka Mukroh ka dei kaba hap hapoh ka District West Karbi Anglong, Assam hapoh ka Assembly session jong ka Assam. Ka KSU WJHDU ka pynshai ba ka Mukroh ka dei ka jaka kaba pura jong ka West Jaintia Hills District naduh ba la kha ia ka jylla Meghalaya ha u snem 1972. Shuh shuh, ha kane ka shnong la shong la sah tang da ki Khasi-Pnar naduh mynkulong mynkumah bad ka hap ruh ha ki Elaka bad Hima ki Khasi-Pnar.
U Dr. Himanta u la kynnoh ruh ba ki Assam Forest Protection Force bad ki Assam Police ki la ia kynad bad ki nongtuh dieng hynrei ka jingshisha hi ka long ba ha ka riti ka dustur u Khasi ka khlaw ka dei jong ka shnong, ne ka raid ne ka ilaka kaba mut ka dei ka jong u paidbah ym jong kano kano ka sorkar. Kumta ha man la ki khlaw ha ka Bri U Hynñiewtrep ki bym hap ha ki kyndon pyrkhing ‘Law Adong, Khloo Blai, ‘Law Shnong, ki nongshong shnong ki lah ban thoh dieng katkum ka jingdonkam ka jong ki. Kumjuh ruh ha Mukroh ki paidbah ki leit thoh dieng na ki khlaw jong ka shnong ban pyndonkam ia ki, bad ka dei ka hok ka jong ki naduh ki por u mynbarim u mynbajah bad ki sorkar khamtam ki sorkar nongwei kim don hok ban kam trai ne tuklar ia ka nongkynti ki Khasi-Pnar.
Ka jingkam u myntri rangbah ka Assam ka long kaba bakla shibun eh bad ka pynpaw ba u kwah kam ei ia ka khlaw shnong ki nongshong shnong ka Mukroh bad kumjuh ruh ia ka shnong Mukroh baroh kawei. Shuh shuh ki paidbah ka Mukroh ha ryngkat ki paidbah ka West Jaintia Hills lem bad ki paid ka Bri U Hynniewtrep baroh kawei kin ym ailad da leilei ruh wat tang shi inshi ka jaka u Khasi kan syntuid sha Assam.
Ka KSU WJHDU ka kyntu ruh ia ka sorkar Meghalaya ba ka dei ban leh eiei halor katei ka jingkam namar ka pyni ba wat hapdeng ka jingiapynbeit pud ki ar jylla, ka Assam im im peit peit ka iai kam trai beit ia ki shnong Khasi ha man la ki jaka ba don ha khappud.
Kane ka long katkum ka kyrwoh khubor ba la phah da u Laitphar Syngkrem, President
Khasi Students’ Union, West Jaintia Hills District Unit bad u Leningrad Tariang, General Secretary
Khasi Students’ Union West Jaintia Hills District Unit.