U MDC ka 4-Amwi Khliehtyrshi ma Madonbai Rymbai uba ju long u CEM barim ka JHADC mynta ka sngi 12 tarik u Lber ha ba ai jingkren sha ki lad pathai khubor ha kamra treikam jong u, ula pynrem jur ïaka Executive Committee ka JHADC kaba kynjoh 7 snem kynthih mynta namar ba ka khlem wanrah wat tang kawei ruh ka Bills ban ïasaid hapoh ka Dorbar thawaiñ ka JHADC.
Ula ong haka por ba ïalap Election kiba bun na ki kyrtong kila pynsngew sha ki paidbah ba kin leit rah ïa ki mad ba donkam ban ïakren hapoh ka ïing Dorbar, hynrei kumba long mynta kala paw beit shaba palat ïa ka EC ban pynlong Dorbar khlem kano kano ka Bills ban ïakren.
Ula pynrem jur ïa u ma Thombor Shiwat ula long CEM ha JHADC la 11 snem, hynrei u khlem lah ban tei ïa ka lawei jong ka jaitbynriew kaba phuh ba phieng bad kaba ai jingithuh ba pura ïa ka jinglong kyrpang haka jinglong tynrai jong ka jaitbynriew.
“Kaba donkam mynta ka long ban pynbha pynmiat Modification ïa ki kyndon ain jong ka Riti ka dustur, kumjuh ïa ka rukom tangjait tangkur kaba la donkam bha ban pynbeit. Ha u snem 2013 haka por ba nga long CEM nga la dep wanrah ïa ka Bills kaba ïadei bad ka (Sixth Schedule) ban pynkup bor ïaki trai jylla da ka ïing dorbar Parliament (Lok Sabha) hynrei kane kala sah kut khlem treikam eiei” la ong u ma Madon.
Na ka liang u ma Rymbai ula kynthoh jur ba ka EC jong ka JHADC kaba mynta kala thiah sngi khlem da pyrkhat eiei ïa ka lawei, da kaba kyntu ba ka dei ban thaw ïa ki lad ki lynti ban wanrah ïa kum kine ki Bills kiba donkam na ka bynta ka jaitbynriew katkum ka jingpynkup bor ïa ka District Council.
