U MDC jong ka Mynsngat-Khanduli Constituency u ma Dawan Lyngdoh ula pynpaw ka jingpynrem jur ia ka jingwan jurip jaka (site inspection) hynnin ka sngi da ki briew jong ka Karbi Anglong ryngkat u MLA u Rupsing Teron bad MDC ka Karbi Anglong ka Rena Terangpi lem bad ki bor Pulit, da ka jingthmu jong ban ban buh ia ka BOP kaba dang hap hapoh u pud u sam jong ka Shnong Lapangap, kaba hap ha West Jaintia Hills District eleka shiliangmyntang.
Halor kane u ma Dawan ula ong ba ma u kum u nongmihkhmat paidbah (MDC) ryngkat ki nongshong shnong jong ka thaiñ hi baroh kawei kim lah ban pdiang ia kane ka jingleh jong ka sorkar Assam. Na ka liang jong u, ula buh ka jingkyrpat mar mar ia ka sorkar Meghalaya ban shim khia bad ban tuklar ia kane shwa ban jia ki jingjia ba sngewsih, namar lada ka Assam ka ioh lad ban buh ia kane kan long ka jingeh kaba khraw ia ki briew kiba shong bashah sha kine ki jaka, ong u shuh shuh ma Dawan.
“Ka sorkar Assam ka la dep shna jubor ia ki surok wat lada ki paidbah ki pyrshah kumta ia kane ka BOP na ka liang jong ngi ki paidbah ngim ailad wat tang ban sdang ruh lada ka Assam ka sdang ngim banse ban pyni da ka bor jong u paidbah” la pynpaw u MDC.