Ka Jaiñtia National Council (JNC) ha ka kyrwoh ba la phah ka pynpaw ia ka jingbym sngew iahap bad ka jingshah kawang petrol bomb ia ka ïing sah jong u ma Sniawbhalang Dhar uba long ruh u Symbud Myntri Rangbah ka Jylla ha ki runar bym pat lah ban ithuh. Ka seng ka pynpaw ruh ba mynta la sdang duh ka jingiatiplem bad ka jingiasngew lem hapoh ka Bri u Hynñiewtrep. Baroh u briew ne ka briew ki don ka hok ban pyrshah ne ban buh kano kano ka jingdawa ia ka Sorkar ha la ki jong ki jingsngewthuh bad halor ki kam ba tlot jong ka hynrei ban shu leh pat da ka kam thombor kata ruh ha ïing sah jongno re jongno ka long kabym lah ban pdiang, namar ha kano kano ka ïing ka don la ki khun ki kti ki hynmen ki para, bad mano ban kitkhlieh lada jia eiei.
Ka seng ka pynkynmaw ruh ba ka jylla Meghayala kadei kawei na ki jylla ba lah juh tip kum ka jylla tip briew tip Blei, haoid ym lah ban len ba hateng hateng juh iai takhuh bad kano kano ka bor jong ka aiñ halor ki mat ki jura kum ka Them metor haduh katne ka Sorkar kam pat lah ban pynkynriah ia ki kharmetor basah beaiñ, ka ktem BSF ha East Jaiñtia Hills dang ha kine ki sngi la iohi ba ki lah sdang pyndik ia u Paidbah bad kiwei kiwei ki mat, hynrei ban shu shim ia ka aiñ ha kti ka long ka kam ka bym iahap khamtam ha ka imlang ka sahlang bad ka pynsniewdur ruh ia ka shong suk ka shong saiñ.
Kyntang iawai ka Seng ka kyrpad jur ia ki daidbah ban long kiba jai jai bad ban long ruh ki paidbah ki ban iakhun ym daka bor hynrei da ka jingstad bad ka jingshemphang, ka seng ka kyntu jur ruh ia ka sorkar ba kam dei ban pynbitar ia u paidbah hynrei ka dei ban leh ia ka badei bad kaba donkam eh na ka bynta ka bit ka biang jong u paidbah, pynkut ka kyrwoh na u Publicity Secretary bah Mebanteilang Sukhlaiñ.