U MLA Mawryngkneng Constituency Bah Heavingstone Kharpran, u la pynrem ia ki bor Pulit kiba la leh jubor da kaba bom pathar ia ki paidbah bad pyndonkam ruh da ki Tyndong pynsat khmat (Tear Gas) hynnin ka sngi halor ka jingiakhih jong ka Meghalaya Commercial Trucks Owners and Drivers Association (MCTODA).
Haba ioh ban iakren bad u Bah Kharpran u la iathuh ba katei ka jingsiat Tyndong pynsat khmat ka dang bteng ruh hynne ka step ha kaba bun ki longkmie bad ki khynnah ki la syier namar ka jingiohsngew ia ka jingsawa bad ka jingpyndonkam lathi.
U Bah Heavingstone u la iathuh ba katkum ka jingioh iakren bad uwei na ki Dkhot ka MCTODA, ka jingiakhih ka long kaba jai jai bad ym don jingthmu ei ei ban pynklumar. “Nga pynrem ia kane ka jingleh jong ki kaba ym lah ban pdiang. Ka jingiakhih jong ka MCTODA ka dei kaba jai jai bad kam don kano kano ba ki pynkheiñ ia ki kyndon jong ka aiñ”.
“Nga kyrpad sha ki bor ba halor bad ki bor pulit ba kin shim da kawei ka lynti da kaba lait na ka jingpyndonkam Tear Gas. Nga kyrpad ruh ia ka Sorkar kin khot sha ka miej iakren ban pynbeit ia kane ka jingdawa jong ki kaba la slem” pynpaw u MLA ka Mawryngkneng.
