Ka Hill’s Farmer Union West Jaiñtia Hills District, ka pynrem jur ia ka jingkren tohmet jong u wei u briew u ba kyrteng u Henry Dkhar u ba kam ialade ba u dei u nongkhaii jhur, da kaba kynnoh ‘Dalal’ ia ka synjuk ki nongrep ka Hill’s Farmer Union. Ha ka video ba la pylait ha ka 28-08-2023 la iohi iaka jingkren tohmet jong une u nongkhaii ia ki nongialam jong ka seng halor ka nongrim ba ka HFU ka ieng ban pynduh noh ia ka ‘ Jingot kilo’ ia ki mar rep, ia kaba la pdiang da ka sorkar jylla bad ruh ka Khasi Hill Autonomous District Council (KHADC).
Lyngba kane ka kyrwoh na u President ka Hill’s Farmer Union, West Jaiñtia Hills District u bah Mutshwa Thabah, ka seng ka sngewthamula, hana ba une u briew u sngew don mynsiem ban iarap iaki nongrep, da kaba ‘Ot kilo’ iaki mar rep bad ong ruh ban ym ‘Ot kilo’ lada ka ktah ia ki nongrep. Ka seng ka don ban pynshai, ba kane ka jing ‘Ot kilo’ka ktah ia ka ioh ka kot u nongrep bad ka dei ruh ka jingbanbein ia u nongrep. Ngi ki nongrep ngi sngewduh nong namar ha man ka shiton ba ngi die ia ki mar rep, ki nongrep ki shah ot 100 kilo, bad kane ka 100kg ki nongrep ki shu ai ei ia u nongkhaii bad hato kata kam dei ka jing duhnong? buh jingkylli kylla ka HFU na West Jaiñtia Hills Distict ia u ne u Henry Dkhar.
Ha kine ki sngi, ba ka bai symbai, bai sboh, bai nongtrei bad kiwei kiwei ki la rem lut nadong shadong. Kumta ban ‘AI EI’ iaki nongkhaii 100 kilo naka shiton kadei ka bymlah ban pdiang bad kadei ruh ka jingduh nong bakhraw ia ki nongrep.
“Kumta ngi na kaliang ki nongrep na West Jaiñtia Hills District ngi phah ka khubor kaba shai bad ngi iatylli mlon ban pyrshah ia ka jingot kilo bad ngi sngewduh nong haduh katta katta ban shu ot kilo iaki mar rep jong ngi ki ba ngi la trei shitom da ka umsyep. Ngi kyrpad ba ki bor ka aiñ na ka sorkar ki dei ban pynduh pyndam ia kane ka jingot kilo da ka aiñ kaba khlaiñ ka ba yn lah shisha ban weng ia u shiah uba thar ia ki nongrep jong ngi” pynpaw ka seng.
Shuh shuh ka seng ka ong “Ngi kren da kaba shai ba la da phi kwah ban iohi iaka jingiatylli jong u nongrep ban pyrshah iaka jingot kilo, ngi long kiba kloi ban mih da ki lakh ngut ha madan. Kumta da kane ngi pynrem jur ia une u briew u ba shu kynnoh ‘Dalal’ khlem nongrim ia ka seng, khlem da tip tikna ia ki nongrim treikam jongka Hill’s Farmer Union. Bad ngi dawa ba une u briew u dei ban pynshai halor ka jingkynnoh khlem nongrim jong u, lym kumta ka seng kan ai da kaba tyngeh” pynkut ka kyrwoh.