Ka Jaiñtia Tourism and Environment Society (JTES), Jowai kawei na ki seng kaba trei borbah ban pynkiew ïa ka kam jngohkai pyrthei hapoh ka RI-Lum Jaiñtia, ïa kaba la seng naduh u snem 2006. Mynta ka sngi 6 tarik u Nailar kala sdang biang ïa ki kam babha da kaba pynrung Member thymmai ïaki 5 ngut ki riew rangbah kiba dei napoh ka East bad West Jaiñtia Hills District.
Kine ki 5 ngut ki Member thymmai ki kynthup ïa u Dr. Pherson Nongtdu uba dei u Principal ka Jaiñtia Eastern College, Khlieriat, ma Helping Phawa President Seiñ Raij Tuber, ma Golden Dkhar bad u Hercules Toi kiba dei ki nonghikai (Lecturer) ka Kiang Nangbah Govt. College Jowai lem bad u ma Damekit Khonglah uba la shong thaid kum u Officer ka Soil Conservation.
Ïa ka jingïalang ha kane ka sngi la pynïaid da u ma S.K Lato (President, JTES) uba la pynsngew ïa ka jingkyrkhu bah jong u Blei ïa jylla Meghalaya haba ïanujor bad ki ri jong ka pyrthei, na ka liang u ma M.S. Lhuid Financial Secretary & Founder President JTES, uba la pynsngew shaphang ka jingsdang ïa ka JTES bad kaba la dep ruh ban leh shibun ki kam ba bha ban kyntiew ïa ka kam jngohkai pyrthei hapoh ka Ri-Lum Jaiñtia.
Ula ong naduh basdang ïa ka ha ka snem 2006 ym shem la don kino kino kiba ai jinghikai shaphang ka kam jngohkai (Tourism), nangta ka seng kala sdang ban ïatreilang bad ki bor District halor ka jingmyntoi ong ka kam Tourism bad la sdang ïa ka ‘Discover Jaiñtia’ da kaba pynlong ïa ki prokram ha kylleng ki jaka jong ki shnong bapher bapher.
Hadien 10 snem ka jingpynlong ïa ka ‘Discover Jaiñtia’ kane ka prokram kala paw bha hapoh ka District bad shabar ruh kumjuh, nangta kila sdang ban wad sa ki jaka ba itynnad ki bym pat paw pyrthei kiba hap ban ïaid kjat da ki kynta bad la ai kyrteng ka ‘Explore Jaiñtia’, na kane la lah ban pynpaw pynthei ïa ki kam jngohkai kum ka Krang Shuri bad ka Shnongpdeng.
Kila don shibun ki kam kiba ka seng JEES kala dep ban leh bad kila long ruh kiba jop kata naduh ki prokram ai jinghikai shaphang ka mariang, ka jingthung dieng, ki jingpynkhuid nalor kiwei kiwei de, la ong u ma Lhuid.
Ha kane ka jingïalang mynta ka sngi ka Society ka kyrmen skhem lyngba ka jingpynrung ïa ki 5 ngut kum ki Member thymmai hapoh ka JETS, nangne kan sdang biang ban trei ïa ki kam babha hapoh ka Ri-Lum Jaiñtia da ka jingïatreilang ki paidbah nongshong shnong lem bad ki bor sorkar.
Ha ka juh ka por kitei ki 5 ngut ki member haba ai jingkren kila pynpaw ka jingsngewkmen ban rung hapoh ka shatri jong ka JETS, kum ki riew rangbang kiba ju kit ïa ki kam ba bha ha ka imlang ka sahlang ki kloi ban wanrah ïa ka jingkylla bad ban pynbha shuh shuh ïa ka rukom treikam ha kine ki sngi ban wan.
La ai ka jingkren pdiang sngewbha ïa kitei ki Member thymmai da u ma J.M. Pohsngap Programme Conductor, katba ïa ki kyntien ai khublei la ïoh na u ma R. Lamar Secretary ka JTES.