Ka Food Corporation of India (FCI), FSD Jowai kaba don ha Khliehtyrshi, West Jaintia Hills District mynta ka sngi 23.06.2023 kala ioh ban pynlong ia ka Showcase ne ka jingpyni ia ki rukom pyniaid ia ka kam ka jam, ki jaka buh ia u khaw kumjuh ki jingthoh ne ki sign ban pynithuh ia ki jaka bapher bapher hapoh kane ka jaka sha ki khynnah skul jong katei ka thaiñ.
Mynta ka sngi la ioh ka jingpyni bad jingbatai ia ka rukom treikam bad rukom buh ia u khaw na u Technical Assistant ka FCI-FSD Jowai u bah Darlet Dkhar. U bah Dkhar u la pyni kumno ka rukom ban thew ia ki trok kiba wankit bad pynhap ia u khaw ha kane ka jaka bad kumno ki lum ia ki jingkheiñ thik pathik da ki kor computer bad kumno ruh ki pyllait ne ai ia u khaw na kane ka FCI kaba peit ia baroh kawei ka ri Jaiñtia.
Shuh shuh haka jingiadei bad u khaw plastic kiba ki briew ki juh tieng, u bah Darlet u la iathuh ba une u khaw plastic ba shait ong ki briew, ha ka jingshisha u dei khaw Vitamin uba ka kyrteng jong u ka dei u Fortified Rice, kumta u la kyntu ia ki khynnah skul ba kin iathuh lem ia kane sha kiba haiing hasem jong ki, ba une u jait khaw u dei uba ka sorkar ka la ai khnang na ka bynta ka jingbha bad jingmyntoi jong ki nongbam. U la iathuh ruh ba ha kane ka jaka buh khaw la juh pynpoi kum ia u khaw PHH, AAY, Tide Over, MDM bad kiwei.
Na ka liang u bah Darlet u la ong ba kum kane ka program kaba ai ka jingtip sha ki khynnah skul khamtam kiba don hapoh kane ka thaiñ ba don kane ka tnat treikam ka long kaba don kam bha, na ka bynta ka jingtip jong ki kum ki khynnah skul kumjuh ruh ia ki nongshong shnong hapoh kane ka thaiñ ban tip kumno kane ka tnat ka pyniaid ia ki kam jong ka.
Ha kane ka sngi la donlang ruh u Depot In-charge ka FCI Jowai u Sanjoy Kumar Das, ki nonghikai bad ki nongtrei jong ka FCI Jowai.
