Hadien ba ki nongïalam bad dkhot ka Meghalaya People United Front (MPUF) East Jaiñtia, ka la ai por hapoh ar sngi ïa uwei u bar jylla uba don ïaka dukan die juti ha Khliehrait West, na ka daw ka jingleh heh jong u tei u dkhar ïa ki nongthied jingthied la ki shyrang ne khynthei rangbah ne khynnah, uba shait kren ruh ïa ki kyntien kiba khor sha ki nongwan thied jingthied na katei ka dukan jong u.
Na ka liang u trai katei ka dukan die juti ha nongbah Khliehriat u Ali Mudin, u la shim khia ïa kane ka kam da kaba u la ïathuh bad pynthikna ba u la beh ïa utei u nongtrei jong u, uba ju mlien ban kren sarong bad kren khor ia ki trai ri trai muluk kiba wan thied jingthied na kane ka dukan. U la ïathuh bad pynshai ruh ba baroh shi katta um tip ia ka jinglong jong utei u nongtrei jong u, dei hadien ba la iohi ia ka khubor u la tip bad lap ïa ka jingshisha na ka liang u Ali u la ong ruh ba um shah satia ïa kiwei ki nongtrei jong ban long kiba khlem akor ïa ki nongthied nongpet ne ki customer.
Shuh shuh na ka liang ka seng lyngba u Preisdent u bah Kyrshan Blah, u la ong ba ka seng kam kwah ban ïohi ïa kum kine ki bar jylla kiba leh heh ne kren heh hapoh ka ri ka muluk jong ngi da ki poi ei bad lada ka seng ka dang lap ïa kum kine ki jait briew kam ai lad satia hynrei kan pynher beit ïa ki.