Ka Dorbar Shnong Lama, East Jaintia Hills District, kaba don ruh ha ki thain khappud bad ka Bangladesh, kala pynpaw ka jingpynrem jur ia ka kong Thrina Suchen kaba dei ruh ka trai shnong Lama halor ki jingkynthoh bad kynnoh, khlem nongrim jong ka ia ki nongkitkam ka shnong bad ia ka shnong hi baroh kawei, kaba ka la pynpaw ia kane sha ki lad pathai khubor bapher bapher ha kane ka taiew ba dang shu dep bad kynnoh ruh ba ka la shah lehbein ha ki bor shnong.
Kumta ha ha kaba iadei bad kane ka jingshah kynnoh jong ka shnong ka Dorbar Shnong Lama ha ka 27.10.2021, kala pynlong ia ka jingialang paidbah ban pynshai halor kane ka jingkynnoh khlem nongrim jong ka kong Thrina ia ka shnong.
Na ka liang u Waheh Shnong u ma Tellme Dong, haba kren sha ki lad pathai khubor u la ong, ba ngi na ka liang ka shnong ka khlem tait shnong ne beh shnong beh thaw ia kane ka briew ne pynduh ia ki jingioh myntoi na ki skhim bapher bapher, hynrei ka ioh hi kumba ioh lang kiwei pat ki para nongshong shnong. Ha ka jingiadei bad ka jingbymwan shuh ki briew ban thied jingthied na ka dukan jong ka, namar ba la bthat ia ki briew da ka Dorbr Shnong kat kum ka jingkynnoh jong ka, u la ong kata ka shnong ha ka mon jong u paidbah ngim don jingtip ei ei shaphang kata ka mon jong ki paidbah. U la ong ruh ba kumba long haduh mynta ym pat ju don kano kano ka jingtait shnong ia ki briew hapoh kane ka shnong, namar ka shnong hi ka bud ryntih ia ki kyndon ain ne riti pyniaid jong ka ri India.
Na ka liang u Secretary Shnong u ma Charling Syrti, u la ong ba ka jingkynnoh jong ka kong Thrina ka la long ka jingpynlehrain ia ka shnong ka thaw bad ia ki nongkitkam shnong, da kaba kala kynnoh ruh ba u Secretary Shnong u la wan thong pisa ia ka haduh 50 hajar tyngka kumjuh ruh u la tyrwa lang ia ka ban ai ka scheme na ka bynta ban sngap noh, u la ong kumno kum u Secretary jong ka Shnong un don pisa haduh katta bad kata ka scheme ruh dei u Secretary VCE ba dei peit.
U Secretary VEC u ma Eladmi Suchen, haba kren u la ong ba ka kong Thrina ka la pan RTI naduh u snem 2019, halor ka scheme sorkar hapoh kane ka shnong, kumta na ka liang ka shnong ka lum ia ka Dorbar halor kane hynrei na ka liang ka Dorbar Shnong kam shym lap ba don kano kano ka jingpyndonkam bakla jong ki dkhot ka VEC ia ka scheme. U la ong wat ki bor District ruh ki la dep ban wan pynlong ia ka Enquiry hapoh ka shnong, hynrei na ka liang jong ki ruh kim shym la lap ia ka jingpyndonkam bakla ia ka Scheme sorkar kat kum ka jingkynnoh jong ka kong Thrina. U la ong ruh ba ha ka jingiadei bad ka jingkynnoh jong ka kong Thrina halor ka jingjah jong ka pisa lyngba ka Scheme MNREGS da ka phew lak, ula ong ba ia ka pisa bai nongtrei kala rung beit sha ka Account jong ki job Card Holder katba ia ka bai tiar bai tar pat ngi la thied bad pynbiang lut katkum ka jingdonkam ha ryngkat ki risit ba biang.