Ka Jaintia Fishing and Environment Protection Association (JFEPA), lyngba u President jong ka Asociation u ma D.H. Pde ka kwah ban pynshai bad pyntip sha ki nongshong shnong jong ka nongbah Jowai ba ka JFEPA, ka dei shisha ka Association kaba la rim bha bad la seng ia ka ha u snem 1993 bad la register ruh ia ka ha une u juh u snem hi. Kane ka Association ka la don ruh haduh 18 tylli ki Unit hapoh ka West bad East Jaintia Hills District.
Ka jingthmu bad ka jingkwah jong ka Association ka long ban pynneh pynsah ia ki doh um doh wah ha baroh kawei ka Ri Lum Jaintia bad haduh kine ki sngi ka dang bteng ban iarap ia ki Unit jong ka lada ki don ha kano kano ka jingeh.
Ha kajuh ka por na ka liang ka Association ka kwah ban pynshai ba hadien ba la paw ha ki khubor (Social Media) ba don ki briew kiba pynjulor ia ki signboard jong ka seng kiba la buh naduh u snem 2016, hadien bala pynbna Fish Sanctuary ia ka Syntu Ksiar lyngba ki bor jong ka District Council. Ha kaba kane ka khubor ka pynsngewsih shi katdei eh, kumta na ka liang ka seng kam banse ban ujor sha ka Jowai Police Station ban kem ia ki briew kiba donkti ha katei ka kam ban pynjot pynpra ia ki signboard ba la buh da ka Association khlem da kdew ia kino kino.
Ha kajuh ka por ruh ka Association kam shym la khang ne pyrshah ia kino kino kiba kwah ban pynkhuid pynjngiar ia ka Syntu Ksiar Fish Sanctuary, kaba long ruh ka jaka kaba ka Association ka juh pynlong ka jingpynkhuid kumba ar ne lai sien shi snem bad ka Association ka sngewkmen lada don kiwei ki kynhun kiba treh ban iatrei lang haka jingiadei bad ka jingpynkhuid ia katei ka jaka.
Katba ha ka jingiadei bad ka Fishing Compitetion jong ka seng ka ban long lashai ka sngi 23.09.2023, ka ban sdang naduh ka por 6 baje mynstep haduh 5 baje janmiet, la kyrpad ia ki paidbah bad ia ki dkhot jong ka Association ban iashim bynta lang kumba juh long hi, kumta ka Association ka khmih lynti ia baroh ban iatreilang na baroh khlem da don kano kano ka jingpynthut.
Hynrei ka seng kala pyntip pat ia ki paidbah kino kino ki ba tip bad ithuh ia ki jaka jong ka Panaliar kim bit ban leit khwai shata.