– U Sevenborn Tang u dei uba la ithuh da ka JHADC –
Mynta ka sngi na ka liang ka JHADC kala pynshai halor ka jingthung ia ki Agent ban peit ia ki Forest Revenue Stations jong ka, bad pynshai ruh ba ka Council kam shym la thung ia kino kino ban long ki Agent ha ki Weight-bridge cum Forest Check Point, namar ba ym don kum kita ki Weight-bridge kiba pyniaid da ka Council.
Ia kane ka jingpynshai paidbah ka Council kala leh hadien ba kila mih ki khubor ba ka HITO kala ujor ejahar pyrshah ia u ma Sevenborn Tang ha u Superintendent of Police, East Jaintia Hills District da kaba kynnoh ba u dei u nongpyniaid jong ka Forest Check points ka JHADC.
Ka JHADC ha ka kyrwoh ba la phah sha ki lad pathai khubor kala pynpaw ba dang shen ka HITO kala pan RTI halor ka jingthung ia ki Agent ban pyniaid ia ka Weight-bridge cum Forest Check point kaba don ha Sunapur, East Jaiñtia Hills District. Haba jubab ia kane ka jingkylli na ka liang ka JHADC kala kdew ba kam shym la pyniaid ia kino kino ki weight bridge hapoh u pud treikam jong ka. La kdew ba ka Council ka don ia ki Forest Revenue Station, hynrei kim dei kita ki Weight bridge cum forest check point, kumta ym don Agent ba pyniaid ia ki.
La pynpaw ba ka JHADC kala don ia ki Forest Revenue Station kiba la buh katkum ka Rule 56 jong ka United Khasi & Jaintia Hills Autonomous District (Management and control of Forest) Rules, 1960 bad ia kine la pyniaid hi da ka Council ha ki snem kiba la dep. Hynrei na ka daw jong ka jingduna palat ka jingpynmih pisa na kitei ki Staion ka bym lah ban pyndap wat tang ia ka jingsiew tulop ia ki nongtrei. Kumta ka Council kala sngewdei ban ban aiti noh ha ki riew shimet ban pyniaid ia kitei ki Forest Revenue Station na ka bynta ban pynioh nong ia ka Council.
Ha kaba iadei bad kane ka Council lyngba ka bor bala pynkup ha ka katkum ka Section 12 of the United Khasi & Jaintia Hills Autonomous District (Management and control of Forest) Act, 1958, the management and control of all forest check stations (Revenue Stations), kala khot Tender ia kane ka kam, ha kaba u ma Sevenborn Tang ula ioh ban pyniaid ia kine ki Forest Revenue Station ka Council na ka bynta 3 snem.
La pynshai shuh shuh ba utei u Sevenborn Tang ula shimkhia ia la ka jong ka kamram bad u la lah ruh ban pynpoi pisa man la ka Quarter sha ka Council bad haba nujor ia ka jingpoi ka pisa ka long kaba myntoi shibun haba nujor ia ki snem kiba la dep.
Kumta ka JHADC kala pynpaw ba baroh ki jingkynnoh jong ka HITO ki long ki bym don nongrim, ki bym shisha bad kiba ialam bakla ia ki paidbah. La kynthoh ba ka HITO kala leh ia kane ka kam khlem da jurip bniah ia ki jingshisha baroh.
Khadduh ka JHADC ka pynshai biang ba u ma Sevenborn Tang u dei u Agent ba la thung bad ithuh da ka JHADC ban peit bad pyniaid ia baroh ki Forest Revenue Station jong ka Council, la pynkut ka kyrwoh na JHADC.
