I kong E.L. Warjri, MCS, Addl. Deputy Commissioner iba dei i Civil Sub-Divisional Officer jong ka Pynursla ila pynshai paidbah ha kaba iadei ba ka jingdon ka jingsngewthuh bakla jong ki katto katne ki nongshong shnong ka thaiñ halor ka jingpynlong ia ka Mock Drill ha shnong Rngaiñ.
Na ka liang i SDO ila ong ba ka jingkhang ia u surok ha ka KM ba 32 jong u surok Shillong-Dawki Road ba don ha shnong Rngaiñ, East Khasi Hills District ha kane ka 20 tarik mynta u bnai, naduh ka por 9:30 haduh 11:00 AM kam dei ka jingkhih jumai ba shisha, hynrei ka dei tang ka jingpyni nuksa ia ka rukom ai jingiarap kaba la tip kum ka State Level Mock Exercise bala pynlong da ki bor pyniaid jong kane ka Sub-Division.
Ka ophis kala ioh jingtip ba ki don ki nongshong shnong ka thaiñ kiba la mut ba ka dei ka jingkhih jumai bad ka jingtwa khyndew kaba shisha. Hynrei shwa ia kane na ka liang ki bor pyniaid kila dep ban ai jingtip shwa lyngba ki lad pathai khubor bapher bapher, la ong i SDO.
Na ka liang jong i SDO ila pynpaw ka jingsngew diaw halor kane ka jingjia bad ila ai khublei kyrpang ruh ia baroh kiba la iashim bynta ha kane ka Mock Drill, ban long ka lad jingiarap lada wan jia shisha ki jinglyngshop u jumai.