Ka Joint Action Committee (JAC) jong ki ar tylli ki seng kamai kali kiba don hapoh ka East Jaiñtia Hills District katta ka East Jaiñtia Hills District Tourist Drivers Association Guwahati bad ka Ïatyllilang Drivers And Tourist Taxi Associations mynta ka sngi ka 21 tarik u bnai Nailar 2025 ki la pynlong ïa ka jingïalang ban pynshai paidbah halor ka ejahar kaba ki lah dep ban buh ha ka office u Superintendent of Police ka Ri Bhoi District katta ha ka 18 tarik u bnai Nailar 2025.
Kane ka ejahar ka long, ha ka jingïadei bad ka jinglum ne shim pisa jong ki katto katne ngut ki briew na ki drivers kiba don hapoh kane ka Association bad ha ka ejahar kaba na ka liang kine ki ar tylli ki seng ki lah dep ban buh la paw ruh ïa kawei ka kyrteng jong uwei u briew uba la tip kyrteng kum u Sparly Syngkli uba la shim ïa ka pisa na kine ki nongniah kali lyngba ka UPI kaba la thep ha ka account ka jong u bad kawei ha ka Petrol Pump kaba tip kum ka MS Nongpoh Highway Service Station.
Na ka liang u Bah Happy Rymbai uba dei u President jong ka Ïatyllilang Drivers and Tourist Taxi Associations haba kren sha ki lad pathai khubor u la ai khublei ïa ki bor pulit ba ki la shim khia ïa kane ka kam ban thwet ïa kiba shim kabu bad ban shim pisa na ki kali ki jong ki, u la ong ruh ba u la pyrshang ban ïakren bad ki kattno katne kine ki briew kiba pan pisa hynrei ki khlem treh ban iakren bad na ka liang ka jong ki, ki la shim beit da kawei ka rai ban leit buh da ka FIR, u Bah Rymbai u la ong ruh ba kine kiba khrong ne shim pisa kim salia la ki dei ki khar bangla ki bar jylla ne kino kino hynrei ki shu shim ïa ka pisa bad ki la pyllait noh ïa ki ban leit.
U Bah Romio Nongtdu uba dei u Secretary ka Seng kamai kali ka Ïatyllilang Drivers And Tourist Taxi Associations u ong ba mynta kumba ar bnai tam ei ei ki mad ïa kine ki jait jingeh ha ki lynti bad ym tang kane kaba phylla ruh ka long ba wat hadien ba ka infiltration check gate kaba la dep ban pyllait ïa ki ynda ka la dep ban check ïa ki kot ki sla jong ki briew bad haba ka infiltration ka la pyllait ïa ki ba kin leit noh kine ki briew ki wan ban bud naddien bad ha ka jingdum don ruh ki driver kiba lah phet noh bad ynda ki lah pyrshang ban ïakren kim treh ban ïakren bad ynda ki lah pyrshang ban ïa kren bad ki ban leit ha Police Station ruh kim trei hynrei kine ki pan beit da ka pisa lane ka fine kaba kot shaduh ka T.4,000/- shaneng.
