Ki ar tylli ki seng jong ki nongñiah trok kata ka Meghalaya Commercial Truck Owner & Drivers Association (MCTODA) bad ka All Jaiñtia Cement & Clinker Transports Association (AJCCTA) mynta ka sngi 7 tarik u Jylliew ki kwah ban pynshai paidbah halor ki mat jingdawa pyrshah ïa ki karkhana dewbilat kiba don hapoh ka Ri-Lum Jaiñtia.
U ma Balen Thubru uba long ruh u President ka All Jaiñtia Cement & Clinker Transports Association ula ong katba ka jingïakhih pyrshah ïaki karkhana dewbilat ka dang ïaid shakhmat hapoh ka lama jong ka Joint Action Committee jong ki saw tylli ki seng, hynrei na ka liang ki ar tylli ki kynhun ka JHTOA bad EJHTOTA kila mih noh napoh ka JAC.
Shuh shuh ula ong na ka liang u Chairman ka JAC uba dei u President ka JHTOA ha ka por ba dang ïakhih, ula shim syndon ïa ka rai ban ïehnoh ïa ka kam nongïalam, ula ong sa kawei ka kynhun ka East Jaiñtia Hills Truck Owners and Transporters Association (EJHTOTA) lyngba u President jong ka kiba ïasoi lang ïa ka shithi jingdawa, hynrei kane ruh ka kynhun kala pyntip ba kim kwah shuh ban ïatreilang bad ka JAC.
Na ka liang u ma Balen Thubru u pynrem jur ïa kane ka jingleh jong kitei ki ar tylli ki seng da kaba kynnoh ba ka lah ban don kaei kaei kaba sha lyndet bad u kyntu jur ban long kiba husiar ïa kum kitei ki nongïalam kiba lah ban ïalam bakla ïa ki trai bad nongñiah trok.
Ha ka jingïakhih kaba la pynlong haka 22.04.2025 pyrshah ïa kitei ki karkhana dewbilat, u ong na ka liang u DC ka East Jaiñtia Hills ula khot ïakren ïa ka JAC ban pynbeit ïaka dor bai kali na Lumshnong sha Assam ha ka dor 1500 tyngka shiton. Hynrei na ka liang u DC ula pyntip donkam shwa ka jingïakren markhmat bad ki trai karkhana.
U Chief Adviser ka MCTODA bah S. Kyndait ula ong ‘ngi la dep ban form ïa ka JAC kynthup ïa ki saw tylli ki seng ka MCTODA, AJCCTA, JHTOA bad EJHTOTA, hynrei kaba sngewsih ki ar tylli ki seng kila weng noh. Kumta u buh ka jingkyntu ïa ki trai bad nongñiah trok ba kin ïatreilang bad lada ka jingdawa kam urlong kim banse ban khot da ki lad jingïakhih ba tyngeh.
Ula ong naduh u snem 2021 ka sorkar kala dep ban pynthymmai ïa ka dor jong ka bai kit, hynrei ki trai karkhana kim shym la pyntreikam bad kila siew katba ki mon, u la kyntu ïa ka sorkar ban kan ïatreilang ban pynbor ïa ki tei ki karkhana ban siew katkum ka dor bala dep pynbeit.
Na ka liang u President ka Meghalaya Commercial Truck Owner and Drivers Association (MCTODA) Jaiñtia Unit, u ma Heibormi Pariat, u ong kane ka issue jingdawa kan ïai bteng haduh ban da ïoh ïaka hok.
Haka jingïalang ba la khot pynlong mynta ka sngi hapdeng ka Meghalaya Commercial Truck Owner and Drivers Association (MCTODA) Jaiñtia Unit bad ka All Jaiñtia Cement & Clinker Transports Association ki la shim ïa ka rai ba kin dawa ïa ki juh ki mat jingdawa pyrshah ïa ki karkhana dewbilat, da kaba kin khot ïakren ha kane ka 14 tarik lada ki trai karkhana kim wan mih shakhmat kin pynlong syndon da ka jingïakhih ba tyngeh.
