Haka kynta ban ïatai ïa ka Mang tyngka ka Jaiñtia Hills Autonomous District Council (JHADC) jong ka snem 2026-2027 kaba duna ïa ka jingpyllut da 15,62,38,500/- klur tyngka, ïa kaba yn shim mynjur da ka Dorbar lashai ka sngi Thohdieng 20 tarik u Lber.
Na ka liang u CEM haba pynshai ïa ki jingkdew na ki MDC ka liang pyrshah ïa ki jingduna jong ka Mang tyngka, ula ong kane ka Mang tyngka kala ïaid lyngba ki tnad treikam bapher bapher jong ka Council.
Ula pynshai ruh halor ka skim na ka sorkar kmie jong ka snem 2025-2026 bala ïoh pdiang T.3,50,00,000/- tyngka lyngba ka Digital India Land Record Modernization Programme (DILRMP), kane ka skim ka long shi bynta ban shim jingkheiñ ïaki Land Record jong ki jaka hadien ka jingleh survey da ka Company ïaki shnong kiba don hapoh ka East bad West Jaiñtia Hills.
Ha kaba ïadei bad ka pisa thied kali ula pynshai ba ka Council kala donkam ban thied ïa ka kali kit ñiut naka bynta ka ïew jong ka Council ha Iawthymme Ladthadlaboh, Jowai.
Ula kubur ruh halor ka jingdkoh treikam jong ka tnad Land Revenue & Land Record haduh ba la hap ban pynheh ïa ka bai TA & DA jong ki nongtrei namar ka jingud ba kim ïoh tulop. “Ngin sa peit nangne shakhmat kumno kin treikam hadien bala pynbiang ïa ka jingsiew”.
Ki don haduh lai tylli ki Elaka kiba la donkam ban ïoh ïa u Dolloi ba pura kata ka Sutnga, Sumer bad Rymbai, lada biang ka pisa jong ka Council yn pynlong noh ïa ka Election, ong u CEM.
Na ka bynta ka tnad Taxation Khliehriat Branch, ula pynshai ba ïa ki staff jong ka yn pynkynriah (transfer) napoh ka Council sha katei ka tnad.
Ha kaba ïadei bad ki jingdonkam haki skul ka Council, ula CEM ula ong ka EC kala rai ba ka tnad Education kan pynbiang ïaki jingdonkam da kaba buh 1 nonghikai naka bynta ki 30 ngut ki khynnah skul bad ïa ki skul kiba don 5 ki nonghikai bad 3 ki khynnah yn pyndam noh bad ïa ki nonghikai yn phah sha kiwei pat ki skul.
Ha kaba ïadei bad ka jingpynthymmai ïa ka Website jong ka Council u CEM ula pyntip ba ka EC kala dep ban ïaid shakhmat da kaba ïatreilang bad ka NIC ban pyntreikam ïa ka, wat ïa ki dak thoh “Jaiñtia Alphabet” la rai ban pyntreikam noh, hashwa ban pynrung sha ki skul, yn pynlong ïa ki prokram ai jinghikai.
Halor kiba bun ki jingpynshai ba la kdew da ki MDC ka liang pyrshah halor ka jingduna ka mang tyngka, u CEM ula khot ïa baroh ki MDC ba kin ïatrei lang ryngkat kawei ka jingmut khnang ban kyntiew shaphrang ïa ki jingtreiam jong ka Council.
