U Deputy Commissioner uba dei ruh u Chairman ka DSC jong ka West Jaintia Hills u Abhinav Kumar Singh, IAS, ula pynshai paidbah ha ka jingialang bad ki nongthoh khubor mynta ka sngi ha kaba iadei bad jingdon jong ki post kiba dang thylli ha ka District Selection Committee (DSC) jong ka West Jaintia Hills District, hadien ka jingpynmih khubor da ka HITO.
U Chairman ula pynshai ba ka jingdon jong ki 560 tylli ki post kumba la kdew da katei ka sengbhalang, ki dei kiba la kynthup lang ia ki post JDA, UDA, kam Hikai (Teaching staff), ki Muster Roll na ki Department bapher bapher, ki Wardens bad ki Pharmacist kiba dei shabar na ka jingpeit jong ka DSC.
U la pyntip ba ha ka 19 tarik mynta u bnai kala don ka jingialang kaba la khot da u Local MLA ma Wailadmiki Shylla bad ha kata ka por ka jingdon jong ki post ba thylli ka long 151 tylli katkum ka kaiphot ba la ai na ka tnad DSC. Hynrei nalor kine la bthah ia ki Department bapher bapher ba kin phah shuh shuh ia ki post kiba long thylli ha ki ophis jong ki kumjuh katkum ka jingbud rynti ia ka roster.
Tad haduh ka 26 tarik u May ka DSC kala ioh sa 21 tylli ki post LDA bad sa 83 tylli ki post Grade-4 bad Grade-3 kaba la kynjoh sha ka 255 tylli ki post kiba long thylli ha ka DSC.
U Chairman u la pynshai shuh shuh ba 49 tylli ki post LDA bad 4 tylli ki post Boatmen la dang shu dep thep kam ia ki ha kine ki khyndiat sngi. Katba ka interview na ka bynta ki 16 tylli ki post, ba kynthup ia 11 tylli ki post Sericulture Demonstrator, 4 tylli ki Gram Seva bad 1 ka Gram Sevika kiba yn sa khot interview ha kine ki ar taiew ban wan.
U Abhinav Kumar Singh ula ong ba ka DSC ka la mang ban pyndep lut ia ka jingpynrung kam ha kitei ki post ba thylli hapoh u bnai September lane November jong kane ka snem. U la kyntu ruh ia ki lad pathai khubor ba ki dei ban pynthikna ia kino kino ki khubor kiba iadei bad ka DSC da kaba pan jingtip na ka ophis jong u Deputy Commissioner and Chairman DSC, khnang ban lait na kano kano ka jingsngewthuh bakla ki paidbah.