U myntri kam pohiing ka sorkar pdeng uba dei ruh u myntri ka tnad Cooperation u Amit Shah u la batai ia ki 3 tylli ki aiñ thymmai kiba la treikam ha kylleng ka ri naduh mynta ka sngi kum kiba pynleit jingmut ha ka jingbishar hok ban ia ka jingpynshitom, bad kiba pynleit jingmut ha ki nongshah lehbeiñ.
U la ong ba ha ki aiñ thymmai yn buh hakhmat eh ia ka jingbishar hok ha ka jaka ban pynshitom, ka jingbishar kaba kloi bad ka jingbishar hok kaba kloi ha ka jaka ban pynslem bad ka jingiada ia ka hok jong ki nongshah pynshitom yn pynthikna.
Haba ai jingkren ha ka jingialang bad ki nongthoh khubor kaba la long ha New Delhi, u Amit Shah u la ong ba la saphriang ki jingsngewthuh bakla bapher bapher halor ki aiñ pynshitom beiñ kiba thymmai, kiba thmu ban wanrah ia ka jingkulmar ha ka jingmut jingpyrkhat jong ki paidbah halor kitei ki aiñ.
U la ong ba kawei pa kawei ka bynta jong ki aiñ thymmai la iakren bha bad ki nongshim bynta bapher bapher la saw snem bad ym pat don kano kano ka aiñ ha Independent India kaba la iakren jrong haduh katne.
U myntri kam pohiing u la ong ba hadien 77 snem ba la ioh ia ka jinglaitluid, ka rukom bishar ia ki kam runar jong ka ri India ka la kylla long tynrai pura bad ia kine ki lai tylli ki aiñ thymmai la pyntreikam ha man la ki thanat pulit ha ka ri naduh mynta ka sngi.
U Amit Shah u la ong ba kine ki aiñ ki la bujli ïa ka jingpynshitom da ka jingbishar hok, ka jingbishar stet bad ka jingbishar hok kloi ha ka jaka ban pynslem. Ryngkat bad kane, ki aiñ kiba mynshuwa ki iada tang ia ka hok jong ki pulit hynrei kine ki aiñ kiba thymmai mynta ki don ki kyndon ban iada ia ka hok jong ki nongshah lehbeiñ bad ki nongujor ruh kumjuh.
U Amit Shah u la ong ba kitei ki lai tylli ki aiñ thymmai ki pynpaw ia ka mynsiem India ha baroh kawei ka rukom bishar ia ki kam runar jong ka ri jong ngi. U la ong ba ki don shibun ki kyndon ha kine ki aiñ ki ban long ka jingmyntoi na ka bynta ki paidbah ka ri. U la ong ba ha kine ki aiñ, la weng noh ia kiba bun ki kyndon kiba la iasaid kiba dang iai bteng naduh ka por jong ki phareng bad kiba dang buh jingeh ia ki paidbah bad la pynrung ia ki bynta kiba thymmai kiba iadei bad kane ka juk mynta.
U myntri kam pohiing ka sorkar pdeng u la ong ba ha kitei ki aiñ la buh ia ka jinglong hakhmat eh jong ki bynta bad ki lynnong katkum ka mynsiem jong ka riti synshar ka ri India. U la ong ruh ba la buh hakhmat eh ïa ki kam runar pyrshah ïa ki kynthei khynnah.
U la ong ba da kaba pynrung ia ka lynnong kaba thymmai ha kaba ia dei bad ki kam runar pyrshah ia ki kynthei khynnah, kaba don 35 tylli ki kyndon bad 13 tylli ki kyndon, la pynlong ia ki aiñ kiba thymmai kiba kham jylliew.
U la ong ba kumjuh ruh ym shym la don kano kano ka kyndon ha ki aiñ kiba kham mynshwa ia ka kam runar jong ka jingshah pyniap briew hynrei ha kine ki aiñ kiba thymmai, ha ka sien kaba nyngkong, la batai ia ka jingshah pyniap briew bad la pynbiang ia ka jingpynshitom kaba tyngeh ia kane.
U Amit Shah u la ong ba ha ki aiñ thymmai, la pynduh noh ia ka aiñ pynkhihwin ba la shna da ki phareng. U la ong ruh ba la pynrung da ka bynta ba thymmai na ka bynta ki kam pyrshah ri ha kane ka aiñ ba thymmai ha kaba ka don ka jingpynshitom kaba tyngeh ia kito kiba pynsniew dur ia ka jinglong shitylli ka jinglong ba janai jong ka ri India.