U SP Traffic ka East khasi Hills u S K Prasad ha ka 5 tarik Lber u la pynshai sha ki lad pathai halor ka jingwan kynduh ki nongialam jong ka All Meghalaya Khasi Tourist Taxi Association mynin ia u SP Traffic haba iadei bad ka jingioh lad ki kali Tourist Assam ban ieng katba mon bad ka jingbym shah ieng parking ia ki Kali Tourist Meghalaya ha Khyndai lad hajan Vivanta Parking bad hajan City Hut Dhaba.
Na ka liang U SK Prasad SP Traffic u la ong mynshem snem ka la don ka jingialang ba la pynlong da ka Ophis jong ka tnad Transport ha ryngkat ka jingiadon lang ki nongniah kali na ki Association bapher bapher haduh 9 tylli ki Association halor ka mat ban pynieng ia ki kali bad ki la ai jaka ban ieng ha Parking Muda, bad na ka liang ka Association ka la mynjur ban ieng parking ha Muda bad ki la mynjur ban ym ieng klumar ha ki thaiñ khyndailad bad na ka liang ka tnad Pyniaid kali ka ai lad ruh ia ki kali Tourist ka Jylla ba kin ieng ha Khyndai lad haduh ka por 7 baje mynstep ba kin thep passenger ba kin leit buh sha kylleng ki jaka.
U la bynrap ruh ba ka sorkar ka la ithuh 7 tylli ki jaka ha sor shillong ha kaba yn khlieh da u ADC , ki ophisar jong ka Pwd ,Ki Ophisar Muda, ki Ophisar pyniad kali ka tnad Pulit, halor kumno ban shim ia ki sienjam ba biang tam na ka bynta ban tehlakam ia ki jingdheng kali bad kumjuh ban ai ki jaka ieng kali ha ki jaka ha sor shillong. U la ong ruh lada don kino kino ki Pulit Pyniaid kali kiba shim kabu kiba pynkheiñ, ki paidbah ki dei ban wan shakhmat khnang ba ka tnad Pulit kan sa shim ki rai haba iadei bad kino kino ki Pulit kiba pynkheiñ ia kino kino ki aiñ ne shim kabu, bad na ka liang ka tnad Pulit ka kloi ban iatreilang bad ki paidbah bad ka tnad Pulit ka trei bad ialeh ban tehlakam ia ka jingdheng kali ha ka nongbah Shillong.