Ka All Jaintia Muster Roll workers & Labour Union (Seng Kmie) Jowai, ryngkat ka jingiatreilang bad ka Dorbar Shnong Loomiongkjam kumjuh ruh bad ka kong A. Pariat kaba peit ia ka Common Service Centre, ha West Jaintia Hills District kila pynlong ia ka jingialang pynsngewthuh halor ka prokram sorkar kaba pynshlur ia ki nongbylla ban pynrung kyrteng ia lade ha ka E-SHRAM kaba dei ka skhim jong ka Sorkar India lyngba ka Ministry of Labour na ka bynta ki nongtrei bylla hapoh ka ri India.
Ia kane ka jingialang la pyniaid da u Khroo L Pariat uba dei u President ka All Jaintia Muster Roll Workers & Labour Union. U ma Pariat ula batai bniah ruh halor ka skhim E-SHRAM ha kaba ula ong ba na ka liang ka seng kala ju pynlong ia ki jingialang sha ki shnong ba pher ba per jong ka Ri lum Jaintia ban pynsngewthuh ia kito ki nongbylla kiba ioh ka jingsiew kaba hapoh ka Rs.15,000/- shi bnai. Kumta ula kyntu ia baroh ki nongtrei ba ki dei ban pynrung ia lade hapoh katei ka skhim.
La ioh ruh ka jingkren na ka kong Ameecia Pariat kaba la batai bniah bha halor kane ka skhim, bad pynsngewthuh ia ka jingdonkam ban pynbiang ia ki kot ki sla ba donkam kum ki Adhaar, ki Bank Passbook bad ki EPIC na ka bynta ban ioh pynrung ha katei ka skhim.
Mynta ka sngi kila don haduh 20 ngut ki nongtrei na Loomiongkjam kiba la pynrung kyrteng ialade hapoh kane ka skhim.
Ha kane ka sngi la iadon lang ka kong Banaras Dhar, General Secretary ka All jaintia Muster roll workers & Labour Union ka east Jaintia hills district unit ryngkat u ma Jerry Suting President All Jaintia MDM workers Union bad ka kong Hunbeitki Dkhar General Secretary ka Jowai Unit.