U Deputy Commissioner, East Jaintia Hills District, Khliehriat, ha ka jingpyllait khubor u la pynshlur ia ki khynnah pule jong ka District kiba long ki nongshong shnong ba pura ka jylla Meghalaya kiba iabeh sha ki jingpule Technical ban apply ia ka AICTE-Pragati Scholarship Scheme na ka bynta ki khynnah pule kynthei (Degree & Diploma), ka AICTE-Saksham Scholarship Scheme bad ka AICTE-Swanath Scholarship Scheme (Degree & Deploma) kaba long kyrpang na ka bynta ki khynnah pule kiba don jingduna ha ki dkhot met (physically abled).
Kito kiba apply ia ka AICTE-Pragati Scholarship Scheme na ka bynta ki khynnah pule kynthei, ki dei ban long kiba pule ha ka 1st year Degree ne Diploma level course lane ha ka 2nd year Degree ne Diploma Course kaba long katkum ka snem pule ba la buh ha kano kano ka jaka pule AICTE ba la mynjur jong uta u snem. La shah tang 2 ngut ki khynnah kynthei na kawei ka longing ban apply bad ka jingioh jingkot jong ka ing kam dei ban palat ia ka 8 lak tyngka shisnem. Shuh shuh donkam ban suh lang ia ka certificate ban pynshisha na ki bor ba dei peit ryngkat bad ka application. Yn pynthymmai ia ka scholarship ha u snem ban wan na ka bynta ki khynnah pule tang da la ioh pdiang ia ki application ban pynthymmai na ka National Scholarship Portal da kaba thep lang ia ka Promotion Certificate na ka jingpynshisha ba kiew kyrdan na u/ka khlieh duh ki skul / college. Ki khynnah pule ki bym lah ban kiew sha ki klass kiba shajrong kin duh ei ia ka scholarship jong ki.
Ha kaba iadei bad ka AICTE-Saksham Scholarship Scheme ba la mang kyrpang na ka bynta ki khynna pule kiba don jingduna ha ki dkhot met, kiba khynnah pule kiba apply ki dei ban don ha ka kyrdan 1st year Degree ne Diploma Course lane ha ka 2nd year Degree ne Diploma Course da kaba kiew klass ha kano kano ka jaka pule AICTE ba la mynjur jong uta u snem. Ki khynnah pule kiba don jingduna ha ki dkhot met jong ki ka bym duna ia ka 40% ki lah ban apply ia kane ka scheme. Ha kane ka scheme ruh kumjuh, ki jingioh jingkot jong ka longing kam dei ban palat ia ka 8 lak tyngka shisnem bad dei ban da suk lang bad ka certificate ban pynshisha na ki bor pyniaid ryngkat bad ki application. Yn pynthymmai ia ka scholarship ha u snem ban wan na ka bynta ki khynnah pule tang da la ioh pdiang ia ki application ban pynthymmai na ka National Scholarship Portal da kaba thep lang ia ka Promotion Certificate na ka jingpynshisha ba kiew kyrdan na u/ka khlieh duh ki skul / college. Ki khynnah pule ki bym lah ban kiew sha ki klass kiba shajrong kin duh ei ia ka scholarship jong ki.
Ha kaba iadei bad ka AICTE-Swanath Scholarship Scheme (Degree & Diploma), ki ba apply ki dei ban long ki khunswet ne ha kaba ki kmie ki kpa ki la khlad noh na ka jingioh ia ka jingpang Covid-19 ne ki khynnah kiba ri bad sumar da ki bahaiing hasem kiba dei ki shipai iada ri kiba la aiti iala ka jingim ban iap na ka bynta ka ri (Shaheed). Ki nong apply ia kane ka scheme kim dei ban long kiba la ioh ia ka AICTE Sponsored Scholarships na ka sorkar pdeng ne ka sorkar jylla ne kano kano ka AICTE Sponsored Scholarships.
Ki khynnah pule kiba angnud ban apply ia ki Scholarship Scheme ba la kdew haneng ki dei ban apply online lyngba ka website URL www.scholarships.gov.in. Dei ban print bad suh lang ia ki application ba pyndap online ryngkat bad kiwei pat ki kot ki sla ban pynshisha bad kyrshan ia kane. Yn pdiang tang ia ki application ba apply online.
Ka tarik ba khatduh ban submit ia ki application form na ka bynta kane ka scheme kan long ha ka 31 tarik u Nohprah, 2023 bad yn ym pdiang shuh ia ki application kiba thep hadien ka tarik ba la buh. (Khliehriat DPRO)