Hapdeng ka jingduh jingkyrmen namar ka jingban ka jingduk jingkyrduh hadien ka jingkhlad noh u kpa ka ïing, ka kong Martha Phawa na ka Shnong Mihmyntdu kaba hap hapoh ka West Jaiñtia Hills District, ka la shu im jakpoh ba pyndap pynbiang ïa ka ïing ka sem da kaba die dukan sha ha i ïingtrep bajot la katto katne snem.
Watla hadien ba ka la ïoh ïa ka jingiarap da ki tin bala sam da u MLA ha u snem bala dep, hynrei kane ka longkmie kam shym la donlad ban thied ïa kiwei pat ki jingdonkam ban maramot ïa ka dukan jong ka. Kumta ha ka jingkyrduh ka la shu ïaishah ban im jakpoh tang lyngba ine i dukan barit.
Dei ha u bnai Risaw 2023 ka Jaiñtia Hills Development Society, kum ka kynhun kaba juh phai khmat barabor sha ki longïing baduk ba rangli, ha kane ka kynti ka la kner pat ïa ki jingïarap da kaba shna thymmai ïa ka dukan jong kane ka longkmie ryngkat bad ka jingïatreilang bad ka Ophis jong ka KHUBLEI Germany.
Ïa kane ka dukan sha la plie paidbah da u Chairman barim ka Balang Katholik Mihmyntdu u Ma Frederick Synnah, ha ka jingïadonlang u Fr. Manbha Pakem, Director ka JHDS, u Coordinator ka JHDS u Bah Denis Kurkalang bad kiwei de ki Rangbah.
Ha shwa ban aiti ïa katei ka Dukan, la don ka jingïalang ba lyngkot ïa kaba la pynïaid da u ma Denis Kurkalang. Haba ai jingkren u ma Frederick Synnah ula ai ka jingkhublei ïa kitei ki ar tylli ki Organisation kiba don ka mynsiem ban shakri ïa ki briew kiba don ka jingduna ha ka liang ka ïoh ka kot. Ula kyntu ruh ïa ki nongïohkynti ïa katei ka dukan ba ki donkam pat ban treishitom ban sumar bad ban nangpynheh shuh shuh ïa kaei kaba ki la ïohpdiang.
Hadien ka jingot ïa u Ribbon da u Kongsan, la aiti noh ïa katei ka dukan sha ka kong Martha Phawa ryngkat bad ka jingkyrkhu kyrdoh da u Director ka JHDS u Fr. Manbha Pakem.
