Ka BJP Meghalaya ha ka 20 tarik Kyllalyngkot 2025 kala jied biang ia u Rikman Momin kum u President ka Meghalaya State Bharatiya Janata Party (BJP).
Ïa kane ka jingpynbna la pynbna da u Myntri ka sorkar pdeng u George Kurian ha ka jingdonlang jong u Anil Anthony, National General Secretary ka BJP ha ophis trei kam ka seng ha Shillong.
Nalor ka jingshah jied biang jong u Rikman Momin kum u President, la pynbna ruh sa ia ka kyrteng u bah AL Hek, u Bah Sanbor Shullai, bad u bah Ernest Mawrie kiba la sha jied kum ki dkhot jong ka National Council jong ka seng.
Haba kren ha kane ka sngi na ka liang u Rikman Momin u la pynpaw ia ka jingsngewnguh ia ki Nongialam ka seng kiba dang shaniah ia u kum u Nongialam. U la bynrap da kaba ong ba ha ka wei ka sngi ngin sa synshar ia ka jylla khlem ka jingbamsap.
Na ka liang u Anil Anthony, National Secretary ka BJP, u la iaroh ia ki Nongialam ka BJP ba ki la trei shitom ban pynkhlaiñ ia ka seng ha ka jylla.
U la ong ba ka BJP ka la kiew bha ha ki jylla shatei Lamihngi, ha kaba ki don ki jylla ba ka synshar bad ki don ki jylla kum ha Meghalaya kiba don lang ha ka sorkar.