Ka Jingïaseng Samla Jowai Presbytery lyngba ka Socio & Economic Life Development Committee ha ryngkat ka jingïatreilang bad ka Jowai Municipal Board (JMB) kila pynlong ïaka prokram ai jinghikai paidbah halor ka phang ‘Civic Cleanliness (Waste Management)’, ïa kaba la pynlong ha Chutwakhu Indoor Sports Hall, Jowai.
Ïa kane ka jingïalang la pynïaid da u Rev. D.M. Passah uba dei ruh u Chairman ka S&ELD, haka juh ka por ula pdiang sngewbha ïa baroh ki nongwan sha kane ka prokram kiba dei ruh ki Dkhot Delegate jong ka Jowai Presbytery bad la ïoh ruh ka jingpule bad duwai na u Tbn. A. Phawa.
U Chairman ka Jowai Municipal Board u ma P. Lyngdoh haba ai jingkren lyngkot ula ai khublei kyrpang ïaka Jingïaseng Samla Jowai Presbytery kaba la pynlong ïa kum kane ka prokram ai jinghikai haka liang ka khuid ka suba bad ka long kaba donkam eh ha kine ki sngi ba mynta jong ka jingkylla ha ka imlang ka sahlang.
Ula kyntu ïa ki nongwan sha kane ka jingïalang ban kin long ki briew kiba lehkhuid ym tang napoh ïing hynrei ban long kiba lehkhuid shabar ruh kumjuh, khnang ban ïoh ïa ka mariang ba itynnad bad ka lawei kaba phyrnai. U la ong wat ka sorkar jong ka Ri India kala bynta ha ka JBM ban pynlong ïaka ‘Swachh Bharat Mission – Urban 2.0’ ha ki jaka sor na ka bynta ban wanrah ka khuid ka suba.
Shuh shuh ula ong ‘ka pyrthei ka dei ka hok ka kynti jong U Blei’ kumta kum ki nongshong shnong ki dei ban sumar khuid ban nym pynjakhlia ïa ka mariang kaba itynnad bad ban long ki briew kiba don ka jingkitkhlieh na ka bynta ka lawei ba phyrnai bad ban bit ban biang ha ki liang baroh.
Ki riew shemphang kiba la wan ban ai jinghikai ha kane ka sngi ki kynthup ïa ka kong Palvy Dora Kharkongor bad ka kong Larisa Lakadong, IEC Specialist, SMB (Urban) Meghalaya kiba la wan ban ai jingbatai bniah sha ki nongwan ïashim bynta.
La ai jingbatai ruh ïa ka rukom pynïakhlad ïa ki ñiut na ki ïing ki sem ha ki lai bynta, kata kaba pyut, ki bym pyut bad ki ñiut kiba don jingma ïaka koit ka khiah. La pynsngew ruh shaphang ka kyndon aiñ jong ka Solid Waste Management Rules, 2016 jong ka jylla kala pyntreikam ïa kane ka aiñ ban wanrah ïa ka khuid ka suba bad lada lap ïa kiba bret pathar bad pynjaboh ïa ka mariang ki lah ban shah pynshitom.
La ong ruh ba ka jingthang ïa ki ñiut kiba don jingma la khang pyrshah mynta da ka sorkar namar ka jingmih jong ka lyer ba jakhlia ka ktah ïa ka jingring mynsiem bad kino kino kiba pynkheiñ kin shah daiñ kuna haduh 25 hajar tyngka.
Shibun ki jingbatai bapher bapher kiba ïadei bad ka khuid ka suba la pynsngew ha kane ka sngi bad kala don ruh ka jingïaphylliew jingmut lang bad ki nongwan ïashim bynta.