Ka Mihmyntdu Community Social Welfare Association (MCSWA) Targeted Intervention (TI) on Injecting Drug User (IDU) ba don hapoh ka jingkhmih jong ka Meghalaya AIDS control Society kala pynlong ia ka prokram pynsngewthuh paidbah halor ka phang Prevention of Alcoholism and Substance Abuse hapoh ka District West Jaintia Hills ha kane ka 17 tarik mynta u bnai ha Thomas Jones Synod College, Jowai.
Ia kane ka prokram la pynlong ruh ryngkat bad ka jingiatreilang ka ophis jong ka District Social Welfare Officer, Jowai. Ia ka jingialang ha katei ka sngi la pyniaid da ka S.Meliora Lamare, Program Manager of MCSWA TI –IDU Jowai.
La ioh ka jingkren na ka kong J. Synnah, ka DSWO jong ka WJH District, ha kaba kala iaroh ia kane ka kynhun treimon sngewbha kaba la shim khia ban pynlong ia kum kine ki prokram ka ban ai jingmyntoi ia shibun ki samla hapoh ka District kiban sa long ka lawei jong ka ri bad jaidbynriew, ba kin sngewthuh kumno ban lait na ki jait jingdih kiba sniew.
Kala batai ruh shaphang ki skhim kiba pher bapher kiba don lyngba ka tnad Social Welfare kiba kynthup ia ka Child Welfare Scheme, ka Women’s Welfare Scheme bad ka skhim na ka bynta ki briew kiba don jingduna.
Ka kong Synnah kala kyntu ruh ia baroh ki samla pule ba kin pynleit jingmut ha ka jingpule puthi jong ki ym ban ia kyrsum ktieh bad ki jingsniew ba bun jait ha ka imlang sahlang kum ki kynja jingdih pynbuaid bad kiba long kyrni. Ka kyntu kyrpang ruh ia ki samla kynthei ba kin kiar na ka jingkitkhun bym pat dei por.
La ioh ruh ka jingai jinghikai pynsngewthuh shaphang ki jait jingdih ba sniew, ka jingktah jong ki bad ka jingsumar ban lait na kane ka jingmlien ba sniew da ka kong Rinibeth Patlong, Program Manager of MCSWA TI- CC.
Kiwei de kiba ai jingkren ha kane ka sngi ki kynthup ia ka Dr. JN Shullai, kaba la kren halor ki jingtreikam jong kane ka seng MCSWA bad ruh ia ka lynti iaid jong ka seng ha kaba kan sa rakhe ia ka jingdap 40 snem ha u bnai June mynta ka snem.
Ha kane ka prokram la ioh jingkren ruh na uwei na kiba ju mlien bad ngop ha ki kam injek drok ne kita kiba ki khot Injecting Drug User (IDU). Ula kyntu ia ki paidbah ba kim dei ban niew poh ne leh shiliang khmat ia kum kine ki briew kiba la ngop ha ka apot jong u drok.
