-Dawa ka JSU ban pynjynsur snem thep kam pulit haduh 30 snem ka rta-
Ka JSU seng kmie mynta ka sngi hapoh ka jingialam u President seng kmie u samla Jersom Shylla bad u General Secretary u samla Treiborlang R Suchen ki la kynduh ïa ka DGP ka jylla kong Idashisha Nongrang, IPS, ha ophis treikam jong ka bad ki la ïoh ban pynsgew shibun tylli ki mat bad rah da ka dorkhas halor ban pynbha pynmiat ïa ki Police Border Outpost baroh kiba don ha ha jylla khamtam ïa ka Mukroh bad Khanduli bad ban buh kham bun ki Pulit ha ki Border Outpost.
Ka JSU ka la pynsngew ruh ïa ka jingkwah ki khun samla napoh ri lum Jaiñtia kiba wad thep kam pulit ban pynlong ïa ka jingmareh eksam bad ka thoh eksam Pulit ban pynlong beit ha Jaiñtia Hills ban pynsuk ïa ka leit ka wan bad jaka leh eksam namar ha nongbah Shillong ka long lypa ka jaka ba khapngiah bad na ka liang ka DGP ka la pyntikna ba ki samla na Jaiñtia Hills kim donkam shuh ban wan mareh Pulit shaduh sha Mawiong lane ha Shillong bad la dep bhah bynta ban pynlong beit ha Jaiñtia kata ha Sahbseiñ ba don ka 3rd Battallion bad ka la ong kane kan pynsuk ïa ki samla bad ïa ka tnat Pulit.
Kumta ki nongialam ka seng ki sngewhun jrut ïa kane ka jingai bynta ka tnat Pulit ban leh eksam hapoh Jaiñtia bad ka seng ka la buh lang ruh ïa ka jingdawa lada long ban ai lad ban thoh ruh ïa ka eksam Pulit ha nongbah Jowai namar ka Jowai kadei ka jaka pdeng jong ka Jaiñtia Hills bad ki la pynsngew ba lada ka NTA la lah ban pynlong ïa ki eksam bapher ha Jaiñtia kan eh aiu lada pynlong sa ïa ka eksam thoh kam Pulit, ha kaba na ka liang jong ka DGP ka la ong ba kin sa shong pyrkhat halor kane ka jingdawa ka seng.
Sa kawei ka bynta ka seng ka lah pynsngew sha ka DGP ba ka rta ban wad kam Pulit kam long satia kaba ïahap kumba ka long mynta naduh 18 haduh 26 snem ka rta namar bun ki khynnah samla ha kane ka rta ki dang dei ka por ïa ki ban pyndep shuwa ïa ka jingpule bad la seng ka la ong dei ban pynjynsur shuh shuh ïa ka rta wad kam Pulit haduh 30 snem ka rta namar bun ki samla na nongkyndong ki shem jingeh ban pyndep ïa ka kyrdan pule ha poh ka rta ba 21 snem kumta ka seng ka la buh ruh ïa ka jingdawa ba dei ban pynheh shuh ïa ka rta thep kam Pulit hapoh ka jylla bad na ka liang ka DGP ka la ong ba kan sa pyrshang ban ïakren bad ka sorkar jylla shaphang kane ka mat kumba la ai jingmut da ka seng JSU.