Ka tnad Meghalaya Sports and Youth Affairs (MSYA) kaba dei ruh ka tnad kaba khmih ia ka kam ïalehkai ha ka jylla ka la ai ia ka jingtikna ba ka jingwan rwai ne ka concert jong u Bryan Adams ba la pynlong ha madan Jawaharlal Nehru Stadium Polo Shillong mynta ka janmiet kan ym don jingktah ei ei na ka bynta ban pynlong jialehkai hadien habud namar la pyndonkam da ka buit ba thymmai.
Ka MSYA ka la pynshai ruh ba lada pynlong ia kino kino ki program ha kane ka madan Jawaharlal Nehru kan ym don ka jingngam ne orpait ka madan namar la wanrah bad siang da ki jingïada ba kyrpang (special protection) kaba dei ruh ka sien ba nyngkong ha ka jylla bad ha ka thaiñ Shatei Lammihngi baroh kawei.
Ka MSYA ka pynpaw ia ka jingkmen ban pdiang (host) ia kum kine ki program ba heh ia kaba la ioh ka jingithuh ha ka pyrthei. Ym lah ban len ba ka madan JN mynta ka dang don hapdeng ka jingialehkai kaba dang iaid ha kine ki khyndiat sngi, kata ka lympung ia kaba la tip kum ka I-League ne Indian League ha kaba ka klob Shillong Lajong kan bteng ia ka jingialehkai ha kane ka madan kaba heh ha ka 14 tarik mynta u bnai.
