U Symbud Myntri Rangbah ka Jylla Bah Sniawbhalang Dhar uba dei ruh u Myntri uba dang khmih ia ka Tnad Pynroi Sor u la kren da ka jingtikna ba ka Sorkar ka don jingkyrmen shibun ba kan lah ban pynkynriah noh ia baroh ki nongshong die madan kynthup ha Laitumkhrah bad G.S Road namar wat ka jaka ba eh tam kum ha 9-Lad la lah ban pynurlong.
Haba ioh ban iakren bad u Myntri ha kaba iadei bad kane ka mat, la ong ba ka Sorkar kan dang treikam khlem pat sangeh bad ia mynta ki dang ïit ia ka jaka ba paka na ka bynta ban pynkynriah ia kitei ki nongdie madan bad hapoh u bnai Nohprah (2025) yn pynkynriah noh ia ki.
Haba kylli da kano ka buit bad ka rukom yn lah ban pynkynriah pat ia ki namar kadei ka jaka kaba kham khim bad duna ki ïing Sorkar.“Kajuh ka rukom kumba nga la leh ha 9-Lad kumta hi kan long. Ka Sorkar ka iatreilang bad shibun ki kynhun” iathuh u Bah Sniawbhalang.
Shuh shuh u la iathuh ba ka thong lane ka wat (phase) ba ar ban kyndang kan long shwa ha Laitumkhrah bad yn bud pat sa kiwei ki jaka.
