U Abu Taher Mondal, u Myntri ba khmih ia ka Tnad Bording ka Jylla hynne ka sngi u la pynshai paidbah halor ka jingpynlip bording khah khah bad ka ram ba la sahkut slem ha ka NTPC.
Ha kaba iadei bad ka jingpynlip bording, u Mondal u la iathuh ba ha u snem 2023, ka jylla ka la iaid lyngba ia ka jingeh kaba khraw ha kaba ka tnad ka la hap ban pynlip bording haduh 7 ne 9 kynta ha ka shi sngi namar ka jingduna um, ka jingsah ram bad kiwei ki daw. U Myntri u la pyntikna ba nangne shakhmat yn ym don shuh ka jingpynlip bording (load shedding) hynrei kin don ki jaka ki ban hap ban mad ia ka jingpynlip bording na ka daw ba ka MePDCL kan hap ban pynlip shipor ba dang iaid ka jingshna pynbha bad ka jingkylliang tiar (repair) katkum ka bhah ba la mang lyngba ka skhim RDSS ka Sorkar pdeng “ngim lah ban kylliang ia ki wire lada pynmeh bording, kumta ngi hap ban pynlip bad baroh ki thaiñ kiba iaid lyngba ki sub station kin hap ban iaishah lang shipor” pynshai u Mondal.
U Myntri u la pyntikna ruh ba lada don ki kam rit kam ria ym da donkam ban pynlip bording. Ha kaba iadei bad ki thaiñ Nongkyndong, ka jingpynlip bording ruh kan ym ktah shuh wat ha ki por ba jur slap, hynrei pat kane ka shong ha ka kti jong u nongshna bording ba ka tnad ka la thung ha man ki shnong bad ki dong ba u dei ban shim khia, ong u Myntri.
U Myntri u la iathuh ba ka ram kaba sah mynta ha ka NTPC ka long haduh T.565 klur bad ia kane ka ram u la pyntikna ba yn sa pyndep ha u snem 2026 ne 2027 da kaba siew 15.7 klur shi bnai.
Haba jubab pat ia ka jingkynthoh u Dr. Mukul Sangma ia kaba u la pynpaw ha ka Dorbar Mang Tyngka jong ka Sorkar Jylla kaba dang shu kut ha kine ki 2 taiew, u Mondal u la ong ba u sngew ioh mynsiem ba ki Nongïalam ki kren halor kane ka mat bad u pdiang ruh ia ka jingai jingmut jong u Sangma “Ngam tip kaei ba u Dr. Mukul u ong hynrei naduh ba nga don ma nga hangne nga ioh ia ka jingkyrshan jong u Myntri Rangbah barim ka jylla bad ngam ju khmih lynti ruh ba ngin ioh ia ka jingkyrshan kaba khraw” ong u Myntri.
U Mondal u la iathuh ruh ba ka MeECL ka la ioh ruh ia ka khusnam na ka tnad Bording ka Sorkar pdeng ia kaba la sam da I President bad Symbud President ka India dang shen namar ka jinglah ban pynbha ha ka jingsam bording. Shuh shuh u la ong ba ka tnad hi kam ju shongthait bad ka iai trei ha kaba la iohi ruh ia u soh ba mynta ka jylla ka la kiew sha ka kyrdan C na ka D ha kaba iadei bad ka jingsam bording.
U Myntri u la kyrpad ruh ia ki dukan heh ne Karkhana bad baroh ki ïing ba pyndonkam bording ba kin siew pyndep ia ki bynta jong ki khnang ba ka tnad ka lait na ka jingeh khamtam ka jingthied bording na kiwei ki tnad.