U Symbud Myntri Rangbah ka Jylla Bah Sniawbhalang Dhar uba dei ruh u Myntri ba khmih ia ka Tnad Transport hynne ka sngi ka 4 tarik Naiwieng 2025 u la pyntip ba ka Sorkar ryngkat ka Tnad Transport ka khlem pat rai ei ei halor ka projek Lynti Rel (Railway) ia kaba la wanrah da bun ki riew shimet bad ki synjuk bapher bapher.
Katei ka projek ka long na ka bynta ki Rel ban kit briew bad ki Rel kit mar. Dang shen la mih bun ki jingdawa ba la donkam ban wanrah noh tang ia ki Rel kit mar ban pynsuk ia ki nongkhaïi, ki nongrep na ka bynta ban kyntiew ia ka ioh ka kot da kaba ioh kabu ban leit rah ia ki mar sha kiwei ki Jylla.
Watla don kiba pdiang don ruh kiba pyrshah, kumta na ka liang u Myntri u la pyntikna ba katei ka kam kaba khia ka dang sahkut “Ia mynta ngi dang ai ka jingpynshai halor kane ka mat bad yn kham shim khyndiat ka por namar kam dei kaba suk” ong u Bah Sniawbhalang.
Shuh shuh u la iathuh ba kane ka kam ka lah ban jia ruh lashai ia kaba ym don ba lah ban tip lypa. Kumta ka donkam ia ka jingiashai bad ki paidbah ha kaba baroh kin don ia kajuh ka jingmut, pynshai u Myntri.
