Hynne ka sngi ka 6 tarik Nailar 2025, ka ‘Sur u Paidbah South West Khasi Hills District’ (SPSWKHD) hapoh ka jingialam jong u Bah Kitborlang Nongrem (Chairman) ryngkat ka jingsynran lang u MLA ka Ranikor Constituency Bah Pius Marwein, MLA Mawkyrwat Constituency Bah Renikton Lyngdoh Tongkhar ki la leit ban ïakynduh ia u Myntri Rangbah ka jylla Conrad K. Sangma ha kaba iadei bad ka jingdonkam ban shna ia ki surok kiba hap hapoh ka South West Khasi Hills District.
Ka khubor kaba kmen ba ki Nongïalam ka SPSWKHD ki la ioh lyngba katei ka jingiakynduh ka long ba u Myntri Rangbah u la dep ban mang lypa na ka bynta ka jingdonkam jong ki briew kiba don hapoh South West Khasi Hills District (SWKHD) ha kaba u la pyntikna ba la dep ban bhah haduh 200 na ka bynta ban pyntrei ia ka Surok na Weiloi sha Keniong ha ka jingjngai kaba long 50 KM.
Na ka liang u MLA ka Mawkyrwat Constituency u la ong ba bun ki surok kiba hap hapoh SWKHD ki la khongreng bad kiba la shu ieh da ki snem khlem shym la maramot shuh bad bun ruh ki Shnong kiba khlem pat ioh surok haduh mynta. Ha kaba iadei bad kane ka mat, u Bah Ronik u la ong ba la dep ban pynsngew bad la ai jingmut ruh ban shna ia ki surok ki ban pyniasoh na kiwei ki Shnong sha kiwei pat kiba kynthup ia ka Jashiar sha Kynshi bad kiwei kiwei na ka bynta ban pynsuk ia ka leit ka wan ki paidbah bad ruh ban myntoi ha ka kam khaïi mar.
Shuh shuh u la ong ba lada lah ban ai ia ki surok kumba la ai jingmut, ym pynmyntoi ruh ia baroh 3 tylli ki Distrik, kata ia ka South West Khasi Hills District, West Khasi Hills District bad Eastern West Khasi Hills District.
Na ka liang u MLA ka Ranikor Constituency, u la ioh ban pynsngew ia ka jingdonkam ban shna pynheh bad pynbha noh ia ka Surok na Mawkyrwat sha Ranikor bad ha kaba iadei bad kane, u Myntri Rangbah u la kular ban pyntreikam ha ka wat kaba ar (phase II) kata hadien ba la dep ia ka Surok Weiloi.
