U Myntri Rangbah ka Jylla, Conrad K. Sangma, hynne ka sngi ka 23 Naitung 2025 ha ka jingialang kaba la long ha phyllaw jong ka Assembly ha Mawdiangdiang u la ai ia ka jingtikna ba satang katto katne por ka Assembly ba thymmai kan sa dep noh pura.
Ia kitei ki kyntien u Sangma u la pyntikna ha khmat ka jingdon jong u Lat ka Jylla, u C. H. Vijayashankar, Symbud Myntri Rangbah – Bah Prestone Tynsong, u Lamphang ka Jylla – Thomas A. Sangma, ha ka program thungdieng kaba la pynlong ha ophis thymmai ha Mawdiangdiang, kaba la iasnohkti lang da ka tnad Forest ha kaba ka jingthmu jong kane ka program ka long ban pynneh ia ka jingjyrngam jong ka mariang bad wanrah ia ka jingitynnad ha katei ka ophis ba thymmai.
Haba ai jingkren ha katei ka sngi, u Conrad u la iathuh ba ka ophis treikam kaba thymmai ka la jan dep pura mynta bad kawei na ki daw ba kham shim por ka long na ki jingpynbiang ia ki jingdonkam kiba shapoh ka Assembly, kaba kynthup ia ki bor jingshai, ki kor pynsawa, ki kor kiba pyntikna ia ka jingkjit ia ki jingsawa kiba dei ruh ki ban pyntikna ba kan ym don ki sur ki ban pynwit na shabar.
