U Bah Sniawbhalang Dhar, Symbud Myntri Rangbah ka Jylla uba dei ruh u Myntri ba khmih ia ka Tnad Pynroi Sor, hynne ka sngi u la ai ia ka jingpyntikna ba ka Sorkar lyngba ka Tnad Pynroi Sor ryngkat ka jingiatreilang bad ka Shillong Municipal Board (SMB) ki dang pynkhreh mynta shaid shaid na ka bynta ban pynbiang ia ki Certificate of Vending (COV) bad ka jaka na ka bynta kito ki nongdie madan kiba khlem pat ioh haduh mynta, kata kyrpang tang ia kiba la shong die jingdie ha 9-Lad.
U Symbud Myntri Rangbah u la iathuh ba ka jingpynkhreh ban pynioh ia ki COV kam dei kaba shu pyndep rukom hynrei ka iaid katkum ka jingtip lang jong ka Sorkar bad ka Shnong. Shuh shuh u la ong ba haduh mynta ka sngi ka 21 Nailar 2025, ym lah ban ai jingkheiñ kaba tikna haduh katno lah ban ai COV namar ia mynta dang bun kiba wan aplai. Nalor kata, u la ong ba ka jaka ha MUDA ruh ym lah ban pyntikna ba kin pynbiang lut ia kito ki bym pat ioh, hynrei halor kane, u Myntri u la ong ba ka Tnad ka pyrkhat ia ka kamai jong ki paidbah, kumta ka jingpynkhreh bad wad ia ka jaka ba biang ka dang iaid.
Na ka bynta kiba la ioh jaka ha MUDA Complex, u Bah Sniawbhalang u la iathuh ba bun kiba la kmen bad ai jingiaroh ia ka jingpyniaid jong ka Sorkar hynrei la ioh ruh ia ka jingai jingmut na katto katne, ba kin pynbha shuh shuh ia ki jaka leit shabar, ka bor jingshai (light) bad ki lynti iaid um khnang ba kan ym shong um ha katei ka jaka.
