U Rakkam A. Sangma, myntri ba khmih ia ka Tnad Pule Puthi ka Jylla, hynne ka sngi u la pyntikna bad pyntip paidbah ba ka Shillong Government College of Enginering College, kaba don ha Mawlai Kynton Massar kaba dei ruh ka Engineering College ba nyngkong ha ka Jylla ba la pyniaid da ka Sorkar, kan sa sdang noh shen ia ki klas mynta u snem, kata katkum ka samoi klas ba iaid lang kum kiwei ki jaka pule.
U Myntri u la iathuh ba hadien ba la ioh ia ka shithi mynjur bad pdiang da ka All India Education Council for Technical Education (AICTE) hynnin ka sngi, ka Tnad Pule Puthi jong ka jylla ka la long la kloi ban pyntreikam noh shaid shaid ia ki jingdonkam na ka bynta ban pynurlong noh ia kane ka jingthmu kaba la buh thong da ki phew snem.
Halor ka jingpyntip paidbah ia katei ka khubor, u Rakkam u la ong “Hadien 53 snem tam ka jylla ka la ioh ia la ka Medical College ba nyngkong ha ka jylla. Namar ba ka AICTE ka la mynjur, ngi la khreh ban sdang noh bad la thung ruh ia ki Nonghikai kontrak kumba 7 ngut (contractual). Ngi la ioh ia ki nonghikai kiba la rangbah bha ha ka kam bad kiba dang samla ruh”.
Ha kaba iadei bad kane ka mat, u Myntri Rangbah ka Jylla, Conrad K. Sangma u la pynpaw ia ka jingkmen ba ka AICTE ka la mynjur bad pdiang (Approved) na ka bynta ban sdang noh ia katei ka shlem pule “sngewkmen ban pyntip ba ka Shillong Government College of Engineering College ka la ioh ia ka shithi jingmynjur na ka All India Education Council for Technical Education (AICTE) na ka bynta ban plie noh ia ka Civil Engineering bad Electrical Engineering Course, kaba la pynlong ruh ban ioh ia ka Engineering College jong ka Sokar ba nyngkong ha ka Jylla” pynpaw u Myntri Rangbah lyngba ki rynsan Social Media.