Ka lehñiam Behdieñkhlam jong ka Seiñ Raij Jowai mynta u snem ne ‘ki saw sngi lai miet’ kala ïaid shait shait haka jingpynkhreh bad kane ka shad Behdieñkhlam kan sdang naduh ka 30 tarik u Jylliew bad pynkut haka 3 tarik jong u bnai Naitung, 2024.
Na ka liang ki nongïalam ka Seiñ Raij Jowai naduh u President ma Hercules Toi, Vice President ma E.M.H. Passah, Assistant General Secretary ma Wyraiki Kharbukhi bad u Dolloi ka Elaka Jowai ma Puramon Kynjing haka jingkren bad ki lad pathai khubor mynta ka sngi kila pynsngew ba ka jingpynkhreh ïa kane ka Lehñiam Behdieñkhlam kala long kaba ïaid beit shakhmat.
U President ma Hercules Toi ula ong ka jinglehñiam mynta u snem kan long kaba kyrpang, ha kaba ki nongïalam saiñ hima sima naduh u Myntri Rangbah ka jylla, ki myntri sorkar bad ki briew kiba nabar ka Ri kin wan ban ia sakhi lang ïa kane ka sngi Behdieñkhlam.
Ha kane ka lehñiam Behdieñkhlam la kyrshan lang naduh ka tnad Arts & Culture, Tourism, Planning, NEC bad ki bor pynïaid District la ong u ma Toi, da kaba kyntu ïa baroh ban ïatreilang khlem da kheiñ ïa ka ñiam ka rukom.
U Dalloi ka Elaka Jowai ma Puramon Kynjing ula pynsngew ba ka Lehñiam Behdieñkhlam kan ïaid ryngkat ryngkat bad ka shad ka kmen, ula khot lang ïa baroh ban wan sakhi sha kane ka lehñiam, lyngba ka jingpyndep ïa ka Behdieñkhlam kan wanrah ïa ka koit ka khiah, ka roi ka par, bad ka jingsuk jingkmen ha baroh ki liang. U la kyntu ïa ki paidbah ban long kiba ïaishah haka por ba rah ïa ki dieng khlam namar ka lah ban pynthut ïa ka leit ka wan jong ki paidbah.
Ha kaba ïadei bad ka jingpynkreh ïaka jingïaid beit ka leit ka wan jong ki kali haka sngi pynkut, u ma Wyraiki Kharbukhi ula pyntip ka jingpynkhreh ïa kine ki jaka pynïeng kali kum ha Chilliang Raij Community Hall ïaki kali VIP, kumjuh hajan madan Biar ka Blai, madan Tpep Pale, ha Skul Seiñ Raij, ki Parking lot kiba don ha Iawmusiang bad ha madan Jerusaleiñ.
La kyrpad ruh ïa ki nongshong shnong na ka thaiñ Poh shnong ba kim bit ban pynmih ïaki kali jong ki khnang ban pynsuk ïa ka leit ka wan jong ki paidbah bad ïa kito kiba pynïeng ïaki kali sha surok kin leit pynïeng ha madan Tpep Pale.
Na ka liang u ma E.M.H. Passah Vice President ula kyntu ban wanrah ïa ka jingkhuid jingsuba da ka jingïatreilang jong ki paidbah baroh ki nongshong shnong ka Jowai, khnang ba ki briew ba nabar kiba wan sakhi ïa ka Behdeiñkhlam kin ïohi ïa ka jinglong khuid ka sor Jowai.
Katkum ka prokram la ong ba ha ka sngi sdang kata ha ka 30 tarik u Jylliew kan don ka jingleit rah ïa “Ka Symbud Khnong” ban pynpoi ha kjat u Loom Soo Iung.