U Symbud Myntri Rangbah ka jylla u ba long ruh u Myntri ka Tnad Home (Police) u la pyntip hapoh ïingdorbar ba na ka liang ki pulit ki la dep ban tohkit ia ki Shipai Border Security Force (BSF) ki ba la shah kynnoh donkti ba leh khlem akor ia ka samla 15 snem ha East Jaintia Hills bad ka Tnad pulit kan sa charsheet noh shen.
Ia kane na ka liang u Bah Prestone Tynsong u la jubab ia ka call attention bad la wanrah da u MLA ka Mawlai, u Bah Brightstarwell Marbaniang halor ka kaiphot khubor, kaba la jia ha Kuliang East Jaintia hills District ha ka 19 Tarik Jylliew 2024.
Haba jubab ia kane, na ka liang u Bah Prestone u la ong “ha ka 20 Tarik Jylliew ka kong Martina Pohshna ka la ujor da ka Ejahar ha Umkiang Police Petrol Post , kaba la kdew ba ha ka 19 Tarik Jylliew 2024, ha ka por 11:30 ki 3 briew ki ba kam ba ki dei ki Shipai BSF, ki bym don hapoh ka uniform, ki la wanrung ha ïing bad thombor ia kane ka longīing”.
U la bynrap ruh da kaba ong “ha ka 20 Tarik Jylliew ha ka por 12:30 mynstep kine ki briew ki la wan biang ha kane ka īing ha ryngkat ki 15 ngut ki wei pat ki la bom bad tied ia u Bah Shanroy bad ki la knieh ia ka mobile na kti ka khun ba dang 15 snem bad ki la ktah kti khlem akor ia ka, bad ki la Kynjat ruh ia ka Kong Martina bad byrngem ruh ia ka khun jong ka”.
U Bah Prestone u la iathuh “na ka liang ka Khliehriat women Police station, ka la register case hapoh ka POSCO Act bad ha kane ka juh ka sngi la rah ia kine ki lanot ban leh medical bad ban tohkit halor kane ka jingjia bad kumba ka long mynta ia kane ka case la dep ban tohkit ba ki pulit ki la pynkhreh ban charsheet noh pyrshah iaki BSF ki ba donkti ban thombor ia kane ka longīing”.
Nalor kane u Bah Tynsong u la iathuh ruh ban tem ia ka kynrum kynram ka ba mih hapdeng ki BSF bad ki nongshong shnong ha ki thaiñ khappud, ka sorkar ka la thaw da ka Coordination Commitee kaban peit halor kine ki mat, kane ka committee kan kynthup ia ki Deputy commissioner, ki SDO, ki SP, ki DGP bad ki Rangbah shnong bad bynrap ruh ba kum kine ki jingjia ki la khamduna naduh ba la thaw ia kane ka Committee.
Haba u Bah Brightstarwell u la kylli hato ki pulit ki la kem katno ngut ki ba donkti hakane ka jingthombor u Bah Tynsong u la iathuh ba ym pat kem iano iano hynrei ki pulit ki la pynkhreh ban charsheet bad ka aiñ kan pynshitom ia ki ba donkti baroh.