ki Nongialam ka All Jaiñtia Mustor Roll Workers and Labours Union (AJMRWLU), ha ka 28 tarik u Nailar, 2024, ki pynpaw ia ka jingbym ïahap halor ka jubab kaba la ai da u Myntri Rangbah ka jylla, u Conrad K Sangma uba la ong ba ïa ka Meghalaya Regular Casual Workers Scheme (MRCWS) la pyntreikam ha baroh ki shnat treikam jong ki ophis bapher bapher.
Haba kren sha ki lad pathai khubor ha Shillong Press Club, ka kong Dayoowanphi Ïakai, President ka seng, ka la ong ba ïa kane ka scheme haduh mynta ym shem la pyntreikam ha baroh ki shnat treikam da kaba pyntip ba ki don ki tnat kiba la pyntreikam ïa kane ka scheme hynrei ki don pat ki tnat kiba haduh mynta ym shem la pyntreikam.
Na ka liang ka seng, ka la kyrpad ba la kumno kumno dei ban pyntreikam noh ïa kane ka scheme ha baroh ki shnat treikam.
Ka seng ka pyntip ruh naduh u snem 2018 ki la phah shithi sha u Conrad Sangma halor ban pyntreikam noh ia ka Meghalaya Casual Worker Scheme hynrei na ka liang jong u, u dang ai tang ki wages bad ka seng ka ai khublei ruh Ia u Mayral Born Syiem uba la rah ia kane ka mat ha ïingdorbar bad na ka liang ka seng ka kyrpad ia baroh ki MLA bad ia ka sorkar khamtam ia U Chief Minister ban rah lang ia kane ka mat jingdawa jong ki ban pyntreikam noh ia kane ka Scheme ha baroh ki shnat treikam namar ka dei ka kam ba rit tam hapoh sorkar, hynrei kaba kongsan pat ia ki.