Hadien ka jingpynbna tarik jong ka Election Commission of India na ka bynta ka General Election sha ka ïing Dorbar thawaiñ jong ka Lok Sabha, 2024 ka ban sdang naduh 19 tarik u April, 2024 na ka liang jong u District Magistrate jong ka West Jaiñtia Hills District u bah B.S. Sohliya, IAS, ula pyntreikam ia ka kyndon 144 CrPC bad pynbna ba ka Election Model Code of Conduct ka la treikam naduh ka 16 tarik u March 2024, ha West Jaintia Hills District baroh kawei.
Kane ka hukum kan treikam na ka bynta ki kyrtong (Contesting Candidates), ki nongbud (Agents) jong ki bad ruh ia ki seng saiñ hima (Political Parties).
Katkum kane ka hukum la khang ban tah ia kino kino ki poster, hoarding, ki banner ne kiwei de ki jingthoh ialap elekshon ha ki jaka paidbah bad kumjuh ruh ha ki lynti syngkieng.
La khang ruh ban pynieng, tah ia kino kino ki lama, ki poster, ki hoarding, ki banner bad kiwei de ha ki jaka jong ki riewshimet khlem da ioh bor ryngkat ka jingthoh na ki trai ïing ne trai jaka bad ruh na ka ophis jong u District Magistrate, ka West Jaiñtia Hills District.
La khang ban pynlong ia kino kino ki jingialang paidbah khlem da ioh bor na ka ophis jong u District Magistrate, ka West Jaiñtia Hills District, bad kumjuh na u Waheh Shnong jong kato ka jaka ba thmu ban pynlong ia ka jingialang paidbah ialap elekshon.
Yn ym shah ban pynsawa ia ki P.A. System hapdeng ka por 10:00PM haduh 6:00AM.
Lada don ka jingpyndonkam ia ki P.A. System ne ki Loud Speakers khlem da ioh bor na ka ophis jong u District Magistrate, ka West Jaiñtia Hills District ia kine ki tiar yn sa kurup noh shisyndon da ki bor ba dei peit.
Yn ym shah ban pynlong ia kino kino ki jingiaid Raly khlem da ioh bor shwa na ka ophis jong u District Magistrate, ka West Jaiñtia Hills District.
La khang ia ka jingrah pisa kaba palat ia ka Rs.50,000/- (Sanphew Hajar) tyngka da ki kyrtong lane da ki nongkyrshan jong ki.
U District Magistrate ula bthah ruh ia baroh kiba don ia ki tiar siat kynthup ia ki suloi, kiba don license ba ki dei ban leit buh noh ia ki sha ki Police Station ne ki Out Post kiba marjan jong ki ryngkat bad ki Xerox copy jong ki licence, ia kine ki tiar yn sa pynphai pat hadien ba la kut ka elekshon. La khang ia kino kino ki briew ban rah ia ki tiar siat, hynrei kane ka hukum kan ym khang pat ia ki Police bad ki Shipai ki ba donkam ba pyndep ia ka duty jong ki.
Kane ka hukum kan treikam ha baroh ka West Jaiñtia Hills District naduh bala pynmih ia ka bad kan bteng haduh ban da kut ka Elekshon Lok Sabha.