Mynta ka sngi u District Magistrate (DM) jong ka West Jaiñtia Hills District bah B.S. Sohliya, IAS ula pyntreikam syndon da kyndon 144 CrPC kum ka lad ban ïada na ka jingpynjaboh ïa ka Wah Myntdu.
Ha kine ki shi sngi ar sngi ki nongshong shnong jong ka nongbah Jowai kiba shaniah umbam umdih na ka Wah Myntdu kila ïakynduh jingeh haba ka um ba pynpoi ka tnad PHE ka long kaba jngut bad kaba jaboh ryngkat ka jingsma iwtung.
Kumta na ka liang jong ki bor pynïaid District ruh kila lap ïa kane ka jinglong jingman jong ka wah Myntdu bad ki shnat wah jong ka, ha kaba ki la dap da ki kyndew ktieh kiba la tuid na ki jaka ba la tih beaiñ ïa ki parmaw, parshyiap bad kumjuh ka jingpyntrei jong ka tnad PWD (Roads) Central Division ïa u surok ba dang thymmai uba sdang naduh jingkieng Treïongriang (DAJ Road) uba poi shaduh sha shnong Khliehtyrshi.
Ha kaba ïadei bad kane na ka liang u DM ula bthah ïa ka tnad PWD kumjuh ruh ïa u Contractor ba pyntrei ïa kane ka surok, ba kin sangeh shwa ïa ka jingpyntrei bad ka jingbret kyndew sha ki bynta jong ka wah, haduh ban da lah ban pynbit pynbiang. Ha kajuh ka por la bthah ia ka PWD (Roads) Central Division ban shim ki lad ki lynti ban wanrah ïa ka jinglong khuid jong ka wah Myntdu.
Ka kyndon kala khang ruh ïa ka jingtihpar ha ki rud jong ka wah Myntdu. La khang ruh ban sait kali, sait jaiñ, ka jingpyllang ïa ki jakhlia (solid/liquid) ha ki rud bad ki bynta jong ka wah Myntdu.
Kane ka hukum ba kyrkieh kan treikam noh mardor naduh ba la pynmih ïa ka tad haduh ban da pynmih da kawei pat.
Ha ka juh ka sngi na ka liang jong u Asstt. Commissioner, West Jaiñtia Hills bah S. Phanbuh, MCS, u la leit ban jurip ïa ki bynta ba la shna ïa ka surok na jingkieng Treïongriang shaduh Khliehtyrshi bad u ai jingtip ruh sha u Contractor ba la pyntreikam ïa ka kyndon 144 CrPC ha baroh shilynter jong une u surok ba dang trei mynta. Kumta la hap ban pynsangeh shwa shipor ïa ka jingpyntrei surok.
