Ka Dorbar Shnong UrMasi -U – Joh ha ka 2 tarik Kyllalyngkot 2025 ka la wan pyntip paidbah sha ki lad pathai khubor ha shillong Press club haba iadei bad ka jingpyrshah jong ka Dorbar Shnong UrMasi -u -Joh ia ka jingithuh shnong thymmai ka KHADC ia ka shnong Mawsaw sha ka Kur Kharkongor Nongthymmai Pohkseh kaba hap hapoh u pud synshar shnong ka Ur Masi u Joh.
Haba kren sha ki lad pathai khubor na ka liang u Sordar Shnong u Bah P Wankhar u la pynpaw ka Dorbar shnong UrMasi -u -Joh ka pyrshah ia kane ka jingithuh shnong ka KHADC ia ka shnong Mawsaw sha ki Kur Kharkongor bad u la ong ,” Na ka liang u CEM ka KHADC u Bah Pyniaid Singh Syiem bad u Bah PN Syiem ha ka por ba u dang long Dy CEM KHADC ban ai jingithuh ia ka shnong Mawsaw sha ka kur Kharkongor hadien ba la ioh pdiang ia ka shithi ha ka 17 tarik Nohprah 2024 na u Dy Secretary ka KHADC ba la soi da u Bah Pynshngain N Syiem Dy CEM KHADC, ka long ka jingkyndit bakhraw ban ai jingithuh shnong thymmai ia ka Mawsaw sha ka Kur Kharkongor Nongthymmai Pohkseh kaba shu leh donbor khlem ka lynti kaba dei kaba iuhroit ia ki Dorbar shnong bad ki Dorbar hima khyrim kumjuh.”
Ka jingai shnong thymmai sha ka kur Kharkongor ka pynshisha ba u CEM KHADC bah Pyniaid Sing Syiem bad u Dy CEM KHADC u Bah Pynshngain N Syiem ki la leh arsap tang ban myntoi ialade ha ka saiñ pyrthei, nangta ka Elekshon MDC ban wan kaba ym don nongrim bad ka bym lah satia ban pdiang da lei lei ruh ia ka jingsynshar donbor ia ka District Council”.
Shuh shuh u la ong “Ka Executive committee jong ka Ur Masi u Joh ka la dep pynlong ia ka jingialang ha ka 20 tarik Nohprah 2024 da kawei ka jingmut ka la pynrem jur ia kane ka jingithuh shnong jong ka KHADC ia ka shnong Mawsaw sha ki Kur Kharkongor bad ka District Council ka dei ban weng noh mardor ia kane ka hukum ka ba shu rai khlem ka lynti kaba dei. “Na ka liang ka Dorbar shnong ur Masi u Joh ka la leit iakynduh ia u Syiem hato u Syiem u la ai jingbit lane ai Noc sha kita ki Kur Kharkongor kiba kwah shnong bad sha ka District Council,hadien ba la dep iakynduh ngi la ioh ka jubab na u Syiem hima khyrim da kaba burom u la pynpaw kam don kano kano ka jingaibor ne Jingai jingbit ban ithuh shnong thymmai ia ka Shnong Mawsaw sha ki Kur Kharkongor bad u Syiem u khlem ai kano kano ka jingthoh ban ithuh ia kata ka Mawsaw sha ki Kur Kharkongor namar u Syiem u la don la ka bynta ka bakhraw kumba ka Hima khyrim kaba bat ia ka riti dustur ban peit ia ka jingdonkam jong ki shnong ki thaw na ka bynta ban biang ka synshar khadar.
Shwa ban pynkut u la bynrap “Ka Nongthymmai Pohkseh ki dei ba shu don ia ka bri, hynrei kim don hok ban tuklar ia u pud synshar shnong kum ba ki ong ka shnong Ur Masi u Joh ka shnong umphyrnai ki ia knieh ia ka jaka ka shnong ur Masi,hynrei na ka liang ka shnong ngi iada bad shi inchi ruh ngim shim re ia ka jaka haba dei ha hok longtrai jong ki ,haba iadei bad u pud u sam shnong ka dei ka kamran jong ngi ban tuklar ym kita ki Kur Kharkongor lada long kumta ym dei tang ka kur Kharkongor kaba don bri ki bun ki Kur ki jait kiba don bri lada kwah ban shna shnong hato ka District Council ka lah mo ban shu ai shnong katba pan ka mut baroh ki jait ba na shnong kin ia pan shnong kaei ban jia kane ka dei ka kam ba bun balang ban thombor ia ka synshar khadar tang ban synjor ka synshar khadar kane bym lah ban pdiang”.