Ka Dorbar Shnong Mookyrdup kala mih shakhmat ban pynpaw ia ka jingpyrshah halor ka jingthmu jong ka Jowai Municipal Board (JMB) ban buh ia ka jaka pynlang jakhlia hapoh u pud u sam ka shnong.
Ka DS Mookyrdup hadien bala ïohi ia ka jingshna jong ka JMB ia ka jaka pynlang jakhlia hapoh u pud u sam ka shnong, nalor kata ha ki bynta bym da jngai na ki ïingsah ki briew kala shong ia ka jingialang kaba kyrkieh ha ka 21.06.2022.
Ha kane ka jingialang la shim ia ka rai ban pyrshah bad ban pynsangeh noh ia katei ka jingpyntrei jong ka JMB ia katei ka jaka pynlang jakhlia kaba dang iaid shait shait mynta.
Kumta na ka liang u Waheh Shnong lem bad ki dkhot jong ka EB kila leit ban buh da ka jingujor sha u Chief Executive Officer ka JMB hynnin ka sngi (23.06.2022) ban pyrshah halor kane ka jingthmu. Ka Shnong kala ai kopi ruh ia ka jingujor sha u Chairman jong ka JMB bad sha u Chairman jong ka Meghalaya State Pollution Control Board, Shillong.
Na ka liang ka DS Mookyrdup kala pynpaw ka jingpynrem jur ia ka JMB kaba la leh ia kane ka kam khlem ka jingtip ne ioh jingbit na ka bor shnong.
Katkum ka jingjurip jong ki nongshong shnong la lap ba kane ka jaka ba thmu ka JMB ban pynlang ia kine ki jaka ka don harud u surok Lulong College Road, mar syndah bad ka Wah Rymphum kaba dei ka shnat jong ka Wah Myntdu, kaba lah ban shah ktah ne pynjaboh ha kano kano ka por. Sa kawei kaba kham sniew shuh shuh ka long ba kane ka jaka ka don hapoh shnong bad marjan bad ki ïing shong briew.
Kumta na ka liang ka Dorbar Shnong Mookyrdup ka dawa na ka JMB ba ka dei ban sangeh noh mardor ia kane ka jingthmu jong ka.
